Կապանի ավագանու որոշմամբ տեղական բյուջեից 990 000 դրամ է հատկացվել թափառող շների համար: Լիցենզավորված ընկերությունը առաջիկայում կսկսի աշխատանքը: Մեկ շան հաշվարկով հատկացվել է 3300 դրամ: Թափառող շները կսպանվեն գիշերը: Տարվա ընթացքում շաբաթական 2 օր կիրականացվի սպանդը` նախապես տեղեկացնելով բնակչությանը: Այլ քաղաքակիրթ մեթոդներ տեղական բյուջեի համար թանկ են:
Ի դեպ, տեղացիները կատակով ասում են, որ անցյալ տարվա սպանդից հետո շները շատացել էին:
Սա, ըստ «Փրկենք կենդանիներին» բարեգործական հասարակական կազմակերպության Նունե Մեհրաբյանի, բնական է: «Սպանված կենդանու տեղը, շատ արագ զբաղեցնում է մեկ այլ կենդանի, որը վարժված չլինելով տվյալ տեղանքին` անհանգստություն է պատճառում բնակիչներին»,-ասում է Ն. Մեհրաբյանը: Վերջինիս համոզմամբ, ամենաընդունված և քաղաքակիրթ եղանակը դա թափառող կենդանիների ստերիլիզացումն է: Այդ մեթոդով վերջիներս չեն բազմանում: Արդյունքում, կենդանիների քանակը դառնում է վերահսկելի: