ИТАР-ТАСС-ի փոխանցմամբ՝ Ադրբեջանի կառավարությունը պատրաստ է այսօր սկսել բնակչության կատարած ավանդների վերադարձման գործընթացը, որոնք ժամանակին սառեցվել են Ադրբեջանական ԽՍՀ-ի խնայբանկերում: Այս մասին հայտարարել է Ադրբեջանի ֆինանսների նախարար Սամիր Շարիֆովը.
«Մենք պատրաստ ենք հունիսի 1-ից սկսել բնակչության կուտակած գումարների վերադարձման գործընթացը՝ հիմք ընդունելով 1992 թվականի հունվարի 1-ի դրությամբ խնայբանկերում նրանց ունեցած ավանդների չափը: Խորհրդային ժամանակ ավանդներ դրած անձինք կարող են դիմում ներկայացնել Kapital Bank-ի (Ադրբեջանում խնայբանկերի իրավահաջորդ) հատուկ կետեր՝ իրենց միջոցները հետ ստանալու համար: Եթե կուտակում կատարած անձի փաստաթղթերը նորմալ վիճակում են, ապա վճարումը կիրականացվի մեկ օրվա ընթացքում:
ԱՊՀ անդամ մի շարք երկրներում ավանդների վերադարձման գործընթացը բավական տևական է՝ 5-10 և անգամ 20 տարի: Ադրբեջանում, սակայն, ավանդների վերադարձը կտևի մինչև 2013 թվականի ավարտը: Ավանդները հետ ստանալու վերաբերյալ հայտարարություններն ընդունվում են մինչև 2012 թվականի դեկտեմբերի 31-ը:
Գործընթացն իրենում ներառում է 2.4 միլիոն ավանդատուների և պահանջում է մինչև 1 միլիարդ մանաթ (1.27 միլիարդ դոլար): Դիմումների ընդունման ու ավանդների վերադարձման համար Kapital Bank-ը ստեղծում է 143 կետ, որոնցից 65-ը բաժին են ընկել Բաքվին: Ավանդների վերադարձման ժամանակ հնարավոր բոլոր վեճերի կարգավորման համար Ադրբեջանի կառավարությունը ստեղծել է հատուկ հանձնաժողով»:
Վերջին տվյալներով՝ Ադրբեջանի ռազմավարական արժութային ռեզերվները գերազանցել են 43 միլիարդ դոլարը:Հիշեցնենք, որ դեռևս նախորդ տարվա նոյեմբերի վերջին տեղի ունեցած խորհրդարանական քննարկումների ժամանակ Ադրբեջանի խորհրդարանի նախագահ Օկտայ Ասադովը հայտարարել էր. «Պետք է այնպես անել, որ ժողովրդին վերադարձրած գումարները մնան Ադրբեջանում, բաժին ընկնեն Ադրբեջանի քաղաքացիներին ու չարտահոսեն դեպի արտասահման։ Մենք գտնվում ենք եվրոպական իրավական դաշտում, և հնարավոր է՝ լուրջ բարդությունների հանդիպենք։ Առաջին հերթին պետք է լուծել այդ խնդիրները»։
Միևնույն ժամանակ Բաքվի «Ազադլըղ» թերթը գրել էր. «Տվյալ հարցում դժվարությունների ի հայտ գալու պատճառն այն է, որ խորհրդային ժամանակաշրջանում Ադրբեջանում ավանդ կատարածներին փոխհատուցում ստացողների թվում կան նաև 400,000 հայեր ու 120,000 ռուսներ:
Ընդհանուր առմամբ, նրանք պետք է ստանան տասնյակ միլիոնավոր դոլարներ, ինչն էլ դժվարացնում է ադրբեջանական իշխանությունների կողմից համապատասխան որոշման ընդունումը։ Ավանդների փոխհատուցման գործընթացը սկսելիս պետք է հաշվի առնել հայերի ու ռուսների գործոնը։ Իսկ դա նշանակում է, որ միլիոնավոր մանաթներ կհոսեն դեպի Ռուսաստան ու Հայաստան»:
