Ռուսական Regnum լրատվական գործակալության փոխանցմամբ՝ Ադրբեջանում Իրանի դեսպանատունը հայտարարություն է տարածել՝ կապված հոգևոր գործիչ Մոհամեդ Հադի Ֆարիդի Ասրին Ադրբեջան մուտք գործելու հնարավորություն չընձեռելու հետ:
Դեսպանատան տարածած հայտարարության մեջ ասվում էր, որ ծառայողական անձնագրով Բաքու ժամանած Ֆարիդի Ասրը հետ է վերադարձվել օդանավակայանից, ինչը հակասում է Իրանի և Ադրբեջանի միջև ծառայողական անձնագրերով անձանց համար վիզային ռեժիմի չեղյալ հայտարարման մասին կնքված հուշագրին:
Հայտարարության մեջ նաև ասվում էր, որ Ֆարիդի Ասրը չի հանդիսանում Իրանի գերագույն ղեկավար ու հոգևոր առաջնորդ, այաթոլլահ Ալի Խամենեիի ներկայացուցիչ և Բաքու էր վերադառնում իր գործունեության շարունակման համար:
Հիշեցնենք, որ ավելի վաղ Ադրբեջանի ԱԳՆ-ի մամլո խոսնակ Էլման Աբդուլաևը հայտարարել էր, թե Ֆարիդի Ասրին Բաքվից հետ ուղարկելն իրականացվել է ադրբեջանական օրենսդրության շրջանակներում: