Սյունիք մարզպետ Սուրիկ Խաչատրյանը երեքշաբթի դեղերի վաճառքով զբաղվող կապանցի գործարարներին առաջարկել է Կապանում վաճառվող դեղորայքի գինը իջեցնել 10 տոկոսով։
Մարզպետի կողմից ստեղծված հանձնաժողովը մարզկենտրոնում կհետևի դեղամիջոցների գներին, մոտ ապագայում նաև մարզի այլ տարածաշրջաններում նույն գործընթացը կարվի։
Մարզի դեղատներում վաճառվող դեղորայքի 80 տոկոսը ձեռք է բերվում հիմնականում «Ալֆա ֆարմ» եւ «Նատալի ֆարմ» ընկերությունների կողմից։ Ըստ Սուրիկ Խաչատրյանի` մեկ շաբաթվա ընթացքում խնդիրը պետք է լուծված լինի։
«Եթե ընկերությունները չհամաձայնեն գները զեղչել, արդեն այլ լծակներ կօգտագործվեն»,-հայտարարել է մարզպետը։ Վերջինիս նման առաջարկ-որոշումը պատճառաբանվում է մարզի բնակչության սոցիալական ծանր վիճակով:
Թե ինչպես է գործելու 10 տոկոս զեղչի մեխանիզմը, հանդիպմանը մասնակից դեղագործական բիզնեսով զբաղվող գործարարների համար առայժմ անհասկանալի է։
«Ինչպե՞ս է հնարավոր այս պահին դեղորայքը այդքան զեղչել. Դրա համար առնվազն 1 ամիս է պետք։ Պահեստավորված ապրանքը դեռ պետք է իրացվի»,- ասացին դեղագործները։
Հիշեցնենք, որ երեկ մարզի հացաթխման ձեռնարկությունների ղեկավարների և մարզպետի հետ հանդիպմանը պայմանավորվածություն ձեռք բերվեց 600-գրամանոց հացը վաճառել 240 դրամով։ Ըստ հացի բիզնեսով զբաղվողների` ալյուրի գնի թանկացումից հետո 600-գրամանոց հացը պիտի արժենար 270 դրամ։
Նշենք, որ այսօրվանից մարզի բոլոր տարածաշրջաններում հացը թանկացել է 30 դրամով։