Քիչ առաջ հայտնի է դարձել, որ Եգիպտոսի նախագահ Հոսնի Մուբարաքը հանդես է գալու հեռուստատեսությամբ: Ըստ Al-Arabia հեռուստաընկերության` հավանաբար Մուբարաքը կհայտարարի, որ չի պատրաստվում իր թեկնածությունն առաջադրել 2011թ.աշնանը կայանալիք նախագահական ընտրություններին:
Al-Jazeera-ն փոխանցում է, որ ըստ իրենց տեղեկությունների` ելույթը լինելու է կարճ, և իբր նա լուծում է առաջարկելու ցուցարարներին:
Սակայն ցուցարարներն արդեն մի քանի օր է` հայտարարում են, որ բացի Մուբարաքի հրաժարականից` այլ լուծում իրենց չի գոհացնի:
Մասնավորապես, այսօր այս մասին հայտարարել է երկրի միավորված ընդիմությունը` Ազգային կոալիցիան հանուն փոփոխությունների:
Twitter-ում ամենաշատ հանդիպող մեկնաբանությունը Մուբարաքի հնարավոր ուղերձի բովանդակության վերաբերյալ հետևյալն է. «Նա ասելու է իր թռիչքի օրն ու ժամը»:
The New York Times-ը հայտնում է, որ ԱՄՆ նախագահ Բարաք Օբաման կոչ է արել Մուբարաքին` չառաջադրելու իր թեկնածությունը առաջիկա նախագահական ընտրությունների ժամանակ: Այս մասին թերթին հայտնի է դարձել Վաշինգտոնի և Կահիրեի դիվանագիտական աղբյուրներից: Դրանով ամերիկյան վարչակազմը սկսում է Մուբարաքից հրաժարվելու քաղաքականություն իրականացնել: