Իրանական mashreghnews.ir կայքի փոխանցմամբ՝ Իրանը պատրաստվում է մոտ ժամանակներս համատեղ զորավարժություններ անցկացնել հարևան երկրներից մեկի հետ: Այս մասին հայտարարել է Իրանի զինված ուժերի հրամանատարի տեղակալ Մոհամեդ Մահմուդին:
Վերջինիս խոսքերով՝ մոտ ժամանակներս Իրանի ցամաքային զորքերը համատեղ զորավարժություն կանցկացնեն հարևան երկրներից մեկի համապատասխան կառույցների հետ: Մահմուդին հավելել է, որ ներկայումս իրենք բանակցում են տվյալ խնդրի շուրջ՝ ընդգծելով, որ զորավարժությունների անցկացման ժամկետի ու վայրի մասին կհայտարարվի ավելի ուշ:
Նշվում է, որ ավելի վաղ Իրանի զինված ուժերի գլխավոր շտաբի օպերացիաների հարցերով պետի տեղակալ, գեներալ Մուսթաֆա Սալամին հայտարարել էր, որ 2013 թվականի հունվարին Իրանը համատեղ զորավարժություններ է անցկացնելու Օմանի զինված ուժերի հետ: Սալամին հավելել էր, որ այդ համատեղ զորավարժություններն անցկացվելու են Իրանի Բենդեր Աբաս նավահանգստում: