«Առաջին լրատվականը» երեկ տեղեկացրել էր, որ ԱՄՆ պետքարտուղարությունը զգուշացրել էր իր քաղաքացիներին Ադրբեջանում ահաբեկչական վտանգի մասին: Այս հարցին այսօր անդրադարձել է ռուսական Независимая газета-ն։
Թերթը գրում է, որ ամերիկյան այդ նախազգուշացումներին անդրադարձել է Ադրբեջանի ազգային անվտանգության նախարարության հասարակայնության հետ կապերի կենտրոնի ղեկավար Արիֆ Բաբաևը՝ ասելով, որ իրավապահ մարմինները վերահսկում են իրավիճակը, իրականացնում են Ադրբեջանի ազգային անվտանգությունը և շահերը վտանգող գործոնների չեզոքացման կանխարգելիչ միջոցառումներ:
Պարբերականը նշում է, որ սա առաջին դեպքը չէ, երբ ԱՄՆ-ն կոչ է անում իր քաղաքացիներին զգոնություն ցուցաբերել Ադրբեջանում: Հաճախ այդ զգուշացումները պրոֆիլակտիկ բնույթի են` հաշվի առնելով այն մարտահրավերները, որոնց բախվում են Միացյալ Նահանգներն աշխարհում:
Ինչ վերաբերում է այս դեպքին, ապա ԱՄՆ մտավախությունների համար կարող է մի քանի պատճառ լինել: Դրանցից է Իրանի միջուկային ծրագրի շուրջ իրավիճակի սրումը, ինչպես նաև վերջերս Ադրբեջանում իսլամական կուսակցության ղեկավար Մովսում Սամեդովի և նրա կողմնակիցների ձերբակալությունները, որոնք մեղադրվում են ահաբեկչություն կազմակերպելու մեջ:
Թերթը նշում է, որ Սամեդովի ձերբակալությունից հետո Իրանի զանգվածային լրատվամիջոցներում իսկական հակադրբեջանական քարոզչություն ծավալվեց:
Որոշ փորձագետներ կարծիք հայտնեցին, որ Թեհրանը փաստորեն հովանավորում է այդ կազմակերպություններին և շահագրգռված է հարավկովկասյան այդ հանրապետությունում իրավիճակի սրմամբ:
Դրա համար, ըստ НГ-ի, կա ամենաքիչը երկու պատճառ:
Նախ Թեհրանը երազում է, որպեսզի Ադրբեջանն էլ դառնա իսլամական պետություն:
Եվ երկրորդ` ցանկացած ապակայունացում Ադրբեջանում միջազգային հանրության ուշադրությունը կշեղի Իրանի խնդիրներից:
Այս հանգամանքներն էլ, հավանաբար, ամերիկացիներին մտահոգվելու տեղիք են տվել: