Գործող խորհրդարանի վերջին աշխատանքային օրերին ՀՀ ԱԺ-ն հյուրընկալել է Սևծովյան տնտեսական համագործակցության խորհրդարանական վեհաժողովի 39-րդ լիագումար նիստը, որի աշխատանքներին մասնակցում է 10 երկրի շուրջ 70 պատվիրակ:
Ներկայում ՍԾՏՀ վեհաժողովը նախագահում է Հայաստանը: ՀՀ Աժ նախագահ Սամվել Նիկոյանը ողջունեց հյուրերին և նշեց, որ ՀՀ-ն, հանդիսանալով ՍԾՏՀ և նրա խորհրդարանական կառույցի հիմնադիրներից մեկը, կարևորում է խաղաղության ամրապնդումը, բարիդրացիական հարաբերությունների հաստատումը: Ըստ նրա` ժամանակակից աշխարհում բազմակողմ համագործակցությունը և խորհրդարանական դիվանագիտությունը մեծ նշանակություն են ձեռք բերում, և ՀՀ նպատակն է աջակցել ու զարգացնել դա:
Ս. Նիկոյանի խոսքով՝ ՍԾՏՀ-ն քաղաքական և տնտեսական կարևոր գործոն է դառնում, և կառույցը պետք է ոչ միայն ներքին խնդիրների լուծմանը ծառայի, այլ նաև անդամ երկրների և ժողովուրդների միջև վստահության ու փոխըմբռնման հաստատմանը:
ՀՀ նախագահի աշխատակազմի ղեկավար Վիգեն Սարգսյանը հրապարակեց ՀՀ նախագահ Սերժ Սարգսյանի ուղերձը, որում նշվում է, որ ՍԾՏՀ-ն, որպես տարածաշրջանային համագործակցության առանցքային մարմին, մեծ դեր ունի ժողովրդավարական սկզբունքների հաստատման, մարդու իրավունքների պաշտպանության և օրենքի գերակայության հարցում:
«Միջխորհրդարանական երկխոսության հաստատումը էական նշանակություն ունի փոխվստահության հաստատման գործում»,- ասվում է ուղերձում` կարևորելով այն, որ տարածաշրջանային լիարժեք համագործակցության շնորհիվ կարելի է հասնել տևական խաղաղության ու կայունության հաստատման, ՀՀ-ն համոզված է, որ վիճելի խնդիրները կլուծվեն խաղաղ համագործակցության արդյունքում, և շարունակելու է քայլեր ձեռնարկել համագործակցության ու տարածաշրջանում փոխվստահության մթնոլորտի ձևավորման ցանկացած նախաձեռնության ուղղությամբ:
ՍԾՏՀ գլխավոր քարտուղար Լեանիդոս Սոքրիզանտոպուլոսը հայտնեց, որ այս տարվա հունվարի 19-ին կենտրոնակայանում կայացած հանդիպման ժամանակ որոշվել է շեշտը դնել բնապահպանական հարցերի վրա:
Նա հայտնեց, որ մշակվում է կառույցի հեռահաղորդակցության ռազմավարությունը, որը կներկայացվի հունիսին, նաև Թուքիայում կայանալիք ՍԾՏՀ պետությունների ղեկավարների հանդիպմանը կազմակերպության անդամները պետք է վերանայեն և կրկին վերահաստատեն իրենց դիրքորոշումները ՍԾՏՀ ռազմավարության վերաբերյալ և որոշեն, թե դեպի ուր է շարժվում ՍԾՏՀ-ն:
Հիշեցնենք, որ Երևանում նստաշրջանի առաջին օրը կգումարվեն Բյուրոյի ու Մշտական հանձնաժողովի, հաջորդ երկու օրերին` Գլխավոր վեհաժողովի լիագումար նիստերը:
39-րդ լիագումար նիստի օրակարգում ներառված հարցերի թվում են` կազմակերպչական, ՍԾՏՀ կազմակերպության գործունեության, ՍԾՏՀ անդամ երկրներում hարկային համակարգի կատարելագործման, խաղողագործության և գինեգործության զարգացման հեռանկարներին, կազմակերպված հանցագործության դեմ պայքարի ոլորտում համաձայնագրերի իրագործմանը, մշակույթին, կրթությանը, սոցիալական խնդիրներին առնչվող և այլ հարցեր: Կհրապարակվի ՍԾՏՀ ԽՎ հայտարարությունը ՍԾՏՀ կազմակերպության 20-ամյակի կապակցությամբ:
