Եվրոպայի խորհրդի խորհրդարանական վեհաժողովի բյուրոյի նիստում անցյալ ուրբաթ օրը որոշում է կայացվել վերստեղծել Լեռնային Ղարաբաղի հարցով ենթահանձնաժողովը: Հայկական պատվիրակությունը ողջ կազմով դեմ է արտահայտվել:
«Առաջին լրատվականը» ԵԽ-ում Հայ ազգային կոնգրեսի ներկայացուցիչ, քաղաքագետ Արման Գրիգորյանից հետաքրքրվեց, թե այդ ենթահանձնաժողովի վերստեղծումը քաղաքական ի՞նչ հետևանքներ կարող է ունենալ և ի՞նչ պետք է աներ տվյալ դեպքում մեր պատվիրակությունը, որ չի արել:
«Սա, անշուշտ, չափազանց մտահոգիչ իրադարձություն է, հատկապես, որ այդ հանձնաժողովի գործունեության հիմքը տխրահռչակ 1416 բանաձևն է լինելու: Հետևանքն այն է լինելու, որ հայկական կողմի դիրքորոշման միջազգային լեգիտիմությանը նոր հարված է հասցվելու: Այդ բանաձևի կետերի իրագործման ուղղությամբ ընդունված որոշումները միայն նման հետևանք կարող են ունենալ:
Ի՞նչ պետք է աներ հայկական պատվիրակությունը, որը չի արել: Իսկ ի՞նչ կարող էր անել ԵԽԽՎ-ում Հայաստանի պատվիրակությունը: Ես կարծում եմ, որ այս դեպքում մենք հիմնական պատասխանատուին պատվիրակության մեջ չէ, որ պետք է փնտրենք: Այդ պատասխանատվությունն առաջին հերթին Հայաստանի իշխանություններն են կրում` իրենց ապաշնորհ դիվանագիտության ու հակաժողովրդավարական քաղաքականության պատճառով, ինչը Հայաստանին դիվանագիտական ճնշումների համար ավելի հեշտ թիրախ է դարձրել:
Իսկ պատվիրակությունը պատասխանատվություն է կրում այնքանով, որ անտրտունջ իր ծառայությունն է մատուցել այդ իշխանություններին և հետևաբար ստիպված է եղել իր ժամանակն ու ռեսուրսները վատնել նրանց քննադատությունից պաշտպանելու վրա, ինչը հաճախ եղել է մեր պետական շահերը պաշտպանելու հաշվին»,- ասաց Արման Գրիգորյանը: