Մամուլի ասուլիսի ժամանակ ԱԺ ՀՅԴ-ական պատգամավոր Լիլիթ Գալստյանը նշեց, որ նախընտրական տարում ապրում ենք քաղաքական վերադասավորումների շրջան, և նկատելի է քաղաքական հիստերիա:
Նա նշեց, որ երկրի հիմնական խնդիրները շարունակում են մնալ սոցիալական անարդարությունը, երկրի սոցիալ-տնտեսական վիճակը:
Լիլիթ Գալստյանն ուշադրություն հրավիրեց արտագաղթի մեծ չափերի, աղքատության բարձր տոկոսի վրա:
Նա կարծիք հայտնեց, որ իշխանություններն անկարող են դիմակայել արտաքին մարտահրավերներին:
Լիլիթ Գալստյանին մտահոգում է, որ այսօր 4000 տարեցներ չեն ստացել իրենց կենսաթոշակը:
ԱԺ ՀՀԿ-ական պատգամավոր Մանվել Բադեյանն էլ, անդրադառնալով փողոցային առևտրի խնդրին, նշեց, որ առկա է սոցիալական խնդիր, և պետք է մտածել այդ առևտուրը «քաղաքակիրթ» ձևով կազմակերպելու մասին:
Լիլիթ Գալստյանը կարծիք հայտնեց, որ քաղաքապետարանը պետք է գտներ այդ մարդկանց առևտուրը կազմակերպելու ձև, քանի որ նրանք մի կապ կանաչի կամ արևածաղկի սերմ վաճառելով իրենց հանապազօրյա հացի խնդիրն են լուծում:
Մանվել Բադեյանն էլ հիշեց, թե ինչպես է վերջերս ականատես եղել «Նաիրի» հյուրանոցում փախստականներին մի սենյակից մեկ այլ սենյակ տեղափոխելուն:
Ըստ նրա` այդ փախստականներին առաջարկում էին ավելի լավ պայմաններ: «Չորս հոգի երկու ոտքը մի մաշիկում էին դրել, չէին ուզում տեղափոխվել, ինչ-որ լրացուցիչ բաներ էին պահանջում»,- ասաց նա:
Լիլիթ Գալստյանը, անդրադառնալով արտագաղթին, նշեց, որ մարդիկ Հայաստանը լքում են ոչ թե այն բանի համար, որ կենսամակարդակն ավելի վատ է, քան 1994-98 թթ. էր, այլ արժանապատվության խնդիր ունեն և դժգոհ են սոցիալական անարդարությունից ու դատական համակարգի անգործությունից: