Al-Jazeera հեռուստաընկերությունը ցուցադրեց, թե ինչպես են Կահիրե մտնում զինվորական ուժեր: Սակայն պարզ չէ, թե ում են նրանք պաշտպանում, քանի որ ցուցարարները ողջունել են նրանց մուտքը Կահիրե:
Ոստիկանություն փողոցներում գրեթե չկա, իսկ քաղաք մտցված զինվորականները չեն միջամտում դեպքերին:
Պետական հեռուստաընկերությունը հայտարարել էր, որ քիչ անց կլինի երկրի նախագահ Հոսնի Մուբարաքի ուղերձը ժողովրդին, սակայն դա դեռ տեղի չի ունեցել: Եգիպտոսի նախագահը լռություն է պահում և իր կարծիքը չի արտահայտել ստեղծված իրավիճակի մասին:
Հայտնի է, որ Ազգային ժովողրդավարական` իշխող կուսակցության մի քանի գրասենյակ է այրվում մայրաքաղաք Կահիրեի կենտրոնում, այդ թվում` կենտրոնական գրասենյակը: Մտավախություն կա, որ կրակը կանցնի Եգիպտոսի և աշխարհի ամենամեծ թանգարաններից մեկը` Ազգային թանգարանը:
Քիչ առաջ ազատ են արձակվել ցերեկը ձերբակալված 4 ֆրանսիացի լրագրողները` Le Figaro թերթից, Paris Match և Journal du Dimanche ամսագրերից և Sipa Press լրատվական գործակալությունից: Դա արվել է Ֆրանսիայի արտաքին գործերի նախարարության միջամտությամբ: Այս մասին հաղորդում է Associated Press գործակալությունը:
Պարետային ժամ է մտցվել, սակայն ակնհայտ է, որ եգիպտացիներն անտեսել են դա. նրանց թիվը գնալով ավելանում է:
