«Լռության ձայն» խմբի լսողության խանգարում ունեցող երիտասարդները նամակ են հղել ՀՀ Հեռուստատեսության և ռադիոյի ազգային հանձնաժողովի նախագահ Գ. Ամալյանին և իրենց դժգոհությունը հայտնել «ԱԼՄ» հոլդինգի փակման կապակցությամբ:
Խնդիրն այն է¸ որ ԱԼՄ հեռուստաընկերությունը միակն էր հանրապետությունում հեռարձակվող տասնյակ հեռուստալիքներից, որը տարիներ շարունակ լրատվական հաղորդումները զուգահեռ ներկայացնում էր ժեստերի լեզվով:
Իսկ «ԱԼՄ» հեռուստաընկերության հեռարձակման դադարեցումից հետո Հայաստանի լսողության խանգարում ունեցող անձինք զրկվել են իրենց մայրենի լեզվով (ժեստերի լեզու) հանրապետությունում և աշխարհում կատարվող իրադարձությունների մասին տեղեկատվություն ստանալուց: Թեպետ տարբեր հեռուստաընկերությունների լրատվական հաղորդումները ուղեկցվում են նաև ինֆորմացիոն բնույթի վազող տողով, դրանք մատչելի և հասանելի չեն նրանց:
«Լռության ձայն» խմբի լսողության խանգարում ունեցող երիտասարդները նամակի պատճեններն ուղարկել են նաև ՀՀ Հանրային հեռուստառադիոընկերության խորհրդի նախագահ Ա. Հարությունյանին և ՀՀ Մարդու իրավունքների պաշտպան Արմեն Հարությունյանին` պահանջելով չանտեսել ՀՀ լսողության խանգարում ունեցող 3500 քաղաքացիների ինֆորմացված լինելու իրավունքները և անհապաղ միջոցներ ձեռնարկել լրատվական հաղորդումների՝ ժեստերի լեզվով թարգմանության համար` չխախտելով լսողության խնդիր ունեցող քաղաքացիների իրազեկված լինելու իրավունքը: