Ինչպես հաղորդում է Al-Jazeera հեռուստաընկերությունը, այսօր սահմանափակվել է Մուհամադ Ալ Բարադեի տեղաշարժը Եգիպտոսում, ուր նա ժամանել է՝ մասնակցելու եգիպտացիների բողոքի ակցիաներին՝ հայտարարելով, որ պատրաստվում է գլխավորել ընդդիմությունը: Տեղեկություններ կան, որ Ալ Բարադեի և ևս 2000 հոգու տեղաշարժը կասեցվել է, և նրանք շրջափակված են մնացել Կահիրեի հրապարակներից մեկում: Այս պահին լրատվական գործակալությունները հաղորդում են, որ Եգիպտոսի ոստիկանությունն ու բանակը դաժանորեն ճնշում են հավաքվածներին` փորձելով թույլ չտալ Կահիրեի փողոցներ դուրս եկած տասնյակ հազարավոր ցուցարարներին անցկացնել իրենց ակցիան: Հեռուստաընկերությունը հաղորդում է, որ օգտագործվում են ռետինե փամփուշտներ, արցունքաբեր գազ և ջրցան մեքենաներ: Կան վիրավորներ և ձերբակալվածներ: Վիրավորվել են նաև BBC և Al-Arabia հեռուստաընկերությունների լրագրողները: Դեպքերի հիմնական թատերաբեմ են դարձել քաղաքի ամենամեծ հրապարակները:
«Առաջին լրատվականը» հետևում է իրավիճակին և զարգացումների մասին ձեզ տեղյակ կպահի: