Քաղաքական և ընտրական տեխնոլոգիաների մասնագետ Արմեն Բադալյանը մայիսի 6-ի ընտրությունները որակում է որպես ֆինանսական միջոցառում, ՀՀԿ-ի մենիշխանություն՝ գումարած ժողովրդավարական դիզայն: Այս մասին նա ասաց «Առաջին լրատվական»-ի հետ զրույցում:
«Հինգերորդ գումարման ԱԺ-ում ժողովրդավարությունը ձևականորեն կպահպանվի: Ճիշտ է, խորհրդարան մուտք գործած մյուս ուժերը նոր օրենքներ կառաջարկեն կամ ՀՀԿ-ի օրենքների վերաբերյալ իրենց առաջարկությունները կանեն, կպահպանվի ժողովրդավարական դիզայնը, բայց իր էությամբ ԱԺ-ն միակուսակցական մարմին կլինի»,- ասաց Արմեն Բադալյանը:
Հարցին՝ կարո՞ղ է նման կազմով ԱԺ-ն երկրում փոփոխություններ կատարել, նա պատասխանեց, որ օրենսդիրը լավագույն դեպքում կարող է երանգային դեր ունենալ, բայց լուրջ դերակատարում՝ ոչ: «Միաժամանակ, ակնհայտ է, որ մայիսի 6-ին կայացած խորհրդարանական ընտրությունները փակեցին հաջորդ տարի կայանալիք նախագահական ընտրությունների հարցը»,- ասաց Արմեն Բադալյանը:
Ամփոփելով՝ քաղաքական և ընտրական տեխնոլոգիաների մասնագետը նկատեց, որ վերջինիս՝ նոր կոալիցիայի անդամ դառնալ-չդառնալուց ՀՀԿ-ն ո՛չ տուժելու է, ո՛չ շահելու: «Եթե ԲՀԿ-ն, այնուամենայնիվ, նոր կոալիցիայի մաս կազմի, ՀՀԿ-ն դա կօգտագործի որպես PR՝ ցույց տալու, որ կոալիցիան վայելում է հասարակության 70-80 տոկոսի վստահությունը (մոտավորապես այսքան է ներկայիս կոալիցիայի ստացած քվեների հանրագումարը)»,- ասաց Բադալյանը:
