Մարտի 1-ի զոհերից Տիգրան Խաչատրյանի մոր՝ Ալլա Հովհաննիսյանի խոսքերով՝ որևէ կուսակցության հետ ՀԱԿ-ի համագործակցությունն ուղղված է «մարդկանց ձայները պահելուն»: Նման տեսակետ նա հայտնեց «Առաջին լրատվական»-ի հետ զրույցում՝ մեկնաբանելով ընտրությունների վերահսկման միասնական շտաբի նիստի ժամանակ ՀԱԿ առաջնորդ Լևոն Տեր-Պետրոսյանի և ՀՀ նախկին ԱԳ նախարար Վարդան Օսկանյանի՝ միմյանց կողք նստելու և պայմանավորվածությունների շուրջ բանակցելու փաստը:
«Ես ինքս զզված ու ցնցված եմ: Գնացել եմ ընտրության ու տեսել եմ, թե ինչ է կատարվում. ժողովրդին դարձրել են ստրուկ: Նորից եմ ասում, Տեր-Պետրոսյանի և Օսկանյանի՝ իրար կողք նստելուն նայում եմ որպես ՀԱԿ-ի ձայները պահելու միջոց: Բայց համագործակցության երբևէ չեմ հավատում, գտնում եմ, որ դա ճիշտ չի լինի»,- ասաց Ալլա Հովհաննիսյանը:
Հարցին՝ ՀԱԿ-ԲՀԿ համագործակցության ֆոնին շարունակո՞ւմ է հույս ունենալ, որ ՀԱԿ-ը կշարունակի հետամուտ լինել մարտի 1-ի դեպքերի բացահայտմանը, նա պատասխանեց. «Այո, հույսս միայն նրա վրա եմ դրել: ՀԱԿ-ը միակ ուժն է, որը կարող է մարտի 1-ի հետ կապված որևէ փոփոխություն մտցնել: Ես կուզեմ, որ նրանք գնան խորհրդարան և այս հարցը բարձրաձայնեն եվրոպական ամբիոններում: ՀԱԿ-ը միակ ուժն է, որ մեր գործը հասցրել է Եվրոպական դատարան: Այնպես որ, մեզ օգնած միակ ուժը եղել է ՀԱԿ-ը և առանձին վերցրած՝ «Ժառանգություն» կուսակցության պատգամավոր Զարուհի Փոստանջյանը, ոչ՝ այդ կուսակցությունը»:
