ՈւԵՖԱ-ն Եվրոպայի 2012 թվականի առաջնության եզրափակիչը չի տեղափոխի Կիևից Վարշավա: Այդ մասին տեղեկացրել է կազմակերպության մամուլի քարտուղար Յուլիուշ Գլուսկին:
«Եզրափակչի համար անհրաժեշտ է 60 հազար հանդիսատես տեղավորող մարզադաշտ, իսկ Վարշավայի մարզադաշտը 50 հազար նստելատեղ ունի»,- նշել է Գլուսկին:
Նա նշել է նաև, որ չի ցանկանում քաղաքական վեճերի բռնվել, այդ պատճառով էլ հրաժարվում է լրացուցիչ մեկնաբանություններից:
Հիշեցնենք, որ անցյալ շաբաթ Լեհաստանի ընդդիմության ամենաազդեցիկ կուսակցության ղեկավար Յարոսլավ Կաչինսկին կոչ էր արել բոյկոտել «Եվրո-2012»-ի` Ուկրաինայում կայանալիք խաղերը երկրի նախկին վարչապետ Յուլյա Տիմոշենկոյի գործի պատճառով: Կաչինսկին կոչ էր անում նաև առաջնության եզրափակիչ փուլը տեղափոխել այլ երկիր, իսկ եզրափակիչ հանդիպումն անցկացնել Վարշավայում:
Լեհաստանի կառավարությունը սուր քննադատության է ենթարկել Կաչինսկու ամպագոռգոռ ելույթները:
