Եվրամիությունը նախանշել է Մոլդովայի և Ուկրաինայի եվրաինտեգրման գործընթացների հնարավոր տարանջատումը։ Չնայած այն հանգամանքին, որ երկու երկրների անդամակցության հայտերը մինչ այժմ դիտարկվում էին զուգահեռաբար, Եվրահանձնաժողովի նախագահ Ուրսուլա ֆոն դեր Լայենը հայտարարել է, որ հիմնարար բարեփոխումների փուլն անցնելուց հետո յուրաքանչյուր թեկնածու կգնահատվի ըստ սեփական արժանիքների։
Բրյուսելում կայացած ԵՄ-Մոլդովա գագաթնաժողովում եվրոպական պաշտոնյաները գովել են Մոլդովայի բարեփոխումների արագությունը՝ ակնարկելով, որ երկիրը կարող է ավելի արագ առաջ շարժվել, եթե պահպանի ներկայիս տեմպը։ Մինչդեռ Ուկրաինայի պարագայում իրավիճակն ավելի զգայուն է․ ԵՄ-ն ձգտում է խուսափել Կիևին հետ մղելու տպավորությունից, քանի որ դա կարող է սխալ ազդակ լինել պատերազմող երկրին։
Այնուամենայնիվ, դիվանագետները փաստում են, որ գործընթացների տարանջատումը ժամանակի հարց է, քանի որ «արժանիքների վրա հիմնված» գնահատումը ենթադրում է անհատական մոտեցում յուրաքանչյուր երկրի նկատմամբ։
