Մարիա Զախարովան հայտարարել է, որ Ռուսաստանը, Բելառուսը, Ղազախստանը և Ղրղզստանը ցանկանում են, որ Հայաստանը որքան հնարավոր է շուտ որոշում կայացնի ԵԱՏՄ-ին և Եվրամիությանը անդամակցելու վերաբերյալ։
«Ռուսաստանը, ինչպես ԵԱՏՄ մյուս երեք երկրները՝ Բելառուսը, Ղազախստանը և Ղրղզստանը, ցանկանում է հնարավորինս շուտ պարզաբանումներ ստանալ այս հարցում», – ասել է Զախարովան։
Դիվանագետը ընդգծել է, որ պատահական չէ, որ ԵԱՏՄ չորս առաջնորդների մայիսի 29-ի համատեղ հայտարարությունում ընդգծվել է Հայաստանում հնարավորինս շուտ ազգային հանրաքվե անցկացնելու անհրաժեշտությունը։ Նրա խոսքով, սա Հայաստանի Սահմանադրությամբ նախատեսված միակ մեխանիզմն է երկրի վերազգային միջազգային կազմակերպություններին անդամակցության վերաբերյալ որոշումներ կայացնելու համար։
Զախարովան հավելել է, որ հայտարարությունը նախատեսում է Ռուսաստանի, Բելառուսի, Ղազախստանի և Ղրղզստանի կառավարությունների կողմից համատեղ զեկույցի պատրաստում, որը կվերլուծի ստեղծված իրավիճակը 2026 թվականի դեկտեմբերին կայանալիք Եվրասիական տնտեսական բարձրագույն խորհրդի նիստի համար։
«Եվ նման աշխատանք անպայման կիրականացվի», – եզրափակել է նա։
Զախարովան հավելել է նաև, որ Հայաստանը մնում է Հավաքական անվտանգության պայմանագրի կազմակերպության (ՀԱՊԿ) լիիրավ անդամ՝ պահպանելով իր բոլոր իրավունքներն ու պարտավորությունները, սակայն արդեն երկու տարի է, ինչ ձեռնպահ է մնում ՀԱՊԿ միջոցառումներին մասնակցելուց։
Նա ընդգծել է, որ Հայաստանի աշխատանքի վերսկսումը կազմակերպությունում կբխի հանրապետության շահերից, քանի որ ՀԱՊԿ-ն իբր մնում է տարածաշրջանային կայունության երաշխավորը։
