Հունիսի 12-ին Իսրայելի վարչապետ Բենիամին Նաթանյահուն Ադրբեջանի անկախության տարեդարձի առթիվ Իլհամ Ալիևին շնորհավորական ուղերձ է հղել և շնորհակալություն հայտնել «անկեղծ բարեկամության համար, որ տարիների ընթացքում ավելի է ամրապնդվու»։ Նաթանյահում կարևորել է Ալիևի ջանքերը, որ, նրա գնահատմամբ, ուղղված են «խաղաղության առաջընթացին» և իսրայելա-ադրբեջանական «ընդհանուր նվաճումների ձեռքբերմանը»։
Իրանա-ամերիկյան բանակցությունների ֆոնին Ալիևին հասցեագրված «հաճոյախոսությունները», բնականաբար, տարակուսանքի տեղիք են տվել և տպավորություն ստեղծել, որ Նաթանյահուն Իրանի դեմ ինչ-որ սեպարատ քայլեր է նախապատրաստում և Ադրբեջանի նախագահին դիտարկել է որպես «վստահելի դաշնակից»։ Այդ ուղերձին Իլհամ Ալիևը հրապարակային չի պատասխանել։
Այս համատեքստում, ինչպես սոցիալական մեդիայի ադրբեջանցի մի քանի օգտատերեր են առանձնացրել, իսրայելական The Jerusalem Post-ը հանդես է եկել «Իրանամետ նարատիվները թիրախավորում են Ադրբեջանի հրեա հերոսին» վերտառությամբ հոդվածով։ Ուշագրավ է, որ ելակետային է ընդունվել «Բաքվի և Իսրայելի միջև տեղեկատվական անվստահությունը», որի ֆոնին, իբր, իրանական ազդեցության գործակալները սոցցանցերում նարատիվ են տարածել, որ ղարաբաղյան առաջին պատերազմի «հերոս Ալբերտ Ահարունովի կերպարը մտացածին է, ստեղծվել է, որպեսզի Ադրբեջանի հետ համագործակցությունը արդարացվի»։
Ալբերտ Ահարունովը, ըստ ադրբեջանական աղբյուրների, «ազգային հերոսի» կոչման է արժացել հետմահու։ Համարվում է, որ նա է խոցել Շուշին գրոհող հայկական տանկը և այդ մարտի ընթացքում էլ սպանվել։ Արտառոց է, որ Ադրբեջանի «ազգային հերոսի» ծնողները բնակվում են Իսրայելում, որտեղ արտագաղթել են 1991թ․-ին, այսինքն իրենց որդու զոհվելուց առնվազն մեկ տարի առաջ։
Ըստ երևույթին, սոցիալական ցանցերի իսրայելցի օգտատերը «ինչ-որ բան» գիտեն։ Ադրբեջանը, իրոք, տարիներ շարունակ ղարաբաղյան առաջին պատերազմը ներկայացրել է որպես «հանուն անկախության եւ հայրենիքի տարածքային ամբողջականության ադրբեջանական բազմազգ ժողովրդի միասնական պայքար»։ Ադրբեջանի «ազգային հերոսի» կոչման է արժանացել նաև ուկրաինացի Ռուսլամ Պալավինկան, որի գերեզմանը գտնվում է Խարկովում։ Ալբերտ Ահարունովի «առասպելի» բացահայտումը ոչ միայն իսրայելա-ադրբեջանական համագործակցության, այլև ղարաբաղյան պատերազմների ադրբեջանական նարատիվների համար կարող է փորձաքար դառնալ։
