Ինչպես գրում է Daily Mail-ը, իր տունը վարձակալությամբ չինացիներին հանձնած բրիտանացի զույգը հայտնաբերել է, որ կենվորներն այն վերածել են կանեփի պլանտացիայի: Զույգը դատական հայց է ներկայացրել վարձակալությամբ բնակվողների դեմ՝ նրանցից պահանջելով 20 հազար ֆունտ՝ տունը նախկին տեսքի բերելու համար:
Օրերից մի օր տուն գալով՝ Շաուն և Քեթի Թոմսոններն իրենց բնակարանում հայտնաբերել են օդափոխության նոր համակարգ, կանեփի հարյուրավոր թփեր, որոնք աճեցվել են ձեղնահարկի հատակին փռված 8 տոննա հողի վրա:
Բրիտանացի ամուսինները մտավախություն ունեն, որ իրենց տան արժեքը կընկնի՝ վարձակալների կողմից այն թմրանյութի ֆաբրիկայի վերածելու հետևանքով: Զույգը երբևէ չէր կարող պատկերացնել, որ իրենց տանը ժամանկավոր բնակություն հաստատած մարդիկ նման բան կարող էին անել: Նրանք մշտապես աչքի էին ընկնում իրենց ինտելիգենտ վարքով, հագուկապով:
Տունը վարձակալության հանձնելուց մի քանի ամիս անց Թոմասն այցելության ժամանակ տարօրինակ հոտ է զգացել, նաև նկատել, որ կահույքի տեղափոխություն է արվել:
– Սենյակի դուռը կողպված էր: Լին իբրև թե բանալի էր փնրում, երբ հանկարծ անհետացավ: Նայեցի պատուհանից ու տեսա նրանց փախչելիս: Ստիպված էի ննջասենյակի դուռը կոտրել և ինչ… այն վերածվել էր պլանտացիայի: Պարզվում է, որ նրանք նույնիսկ ավտոտնակն են օգտագործել կանեփի թփեր աճեցնելու համար,- ասել է Թոմսոնը:
Փախուստից հետո, Լին զանգահարել է Թոմսոնին և խոստացել կարգի բերել տունը, ինչին ի պատասխան՝ Թոմսոնը շնորհակալություն է հայտնել ու կախել լսափողը: Ոստիկանությունն արդեն տեղյակ էր կատարվածի մասին և տանը չափումներ էր անում:
Հողի ծանրությունից տունը կրել է կառուցվածքային վիթխարի վնաս, նրանք փոխել էին էլեկտրասնուցման համակարգը, ծակել պատերը: Ոստիկանությունը տնից առգրավել է 250 հազար ֆունտ ընդհանուր արժողությամբ 498 թուփ:
