Թուրքիայի ներքին գործերի նախարարությունը հետաքննություն է սկսել՝ պարզելու Էրգենեկոնի գործով վերջին սկանդալային տեղեկությունը: Ոստիկանությունը մեղադրվում է գործի հետաքննության ժամանակ մեղադրյալներից մեկի հեռախոսի մեջ իսլամիստական կազմակերպության հետ կապված ավելի քան 100 հեռախոսահամար ապօրինի մուտքագրելու մեջ, ինչն էլ հետագայում դատարանում որպես ապացույց է օգտագործվել:
Համարները մուտքագրվել են լեյտենանտ Մեհմեթ Ալի Չելեբիի բջջային հեռախոսի մեջ, որը 29 ամիս կալանքի տակ է եղել: Սկանդալն առաջացել էր անցած տարվա սեպտեմբերյան լսումների ժամանակ, երբ լեյտենանտի հեռախոսային գրքում դատավորը գտել էր «մոր» և «կնոջ» հեռախոսահամարներ, այն դեպքում, որ զինվորականը մայր և կին չունի: Երեկ Ստամբուլի ոստիկանությունը հաղորդագրություն է տարածել, որ հեռախոսահամարները հնարավոր է՝ մուտքագրվել են սխալմամբ:
Այս օրինախախտման մասին հայտնի դառնալուց հետո այդ հեռախոսահամարները Չելեբիի դեմ որպես ապացույց չեն օգտագործվել: Չելեբիի փաստաբանները մեղավոր ոստիկանների նկատմամբ քրեական գործ հարուցելու պահանջ են ներկայացրել: Ներքին գործերի նախարարությունից հավաստիացրել են, որ օրինախախտում կատարած իրավապահները պատժվելու են,- հաղորդում է hurriyetdailynews-ը: