Եվրոպայում անցել է պետական ծախսերի կրճատմամբ և հարկային ծանրաբեռնվածությամբ ուղեկցվող կոշտ տնտեսական քաղաքականության շրջանը: Նման կարծիք է հայտնել Արժույթի միջազգային հիմնադրամի (ԱՄՀ) տնօրեն Քրիստին Լագարդը:
Ինչպես հաղորդում է Bloomberg-ը, Լագարդի կարծիքով՝ եվրոպական մի շարք երկրներում ընտրությունների արդյունքները ցույց են տվել, որ Հին աշխարհի մարդիկ չեն ցանկանում ընթանալ նման տնտեսական ուղիով:
Լագարդն առաջարկել է յուրաքանչյուր կոնկրետ երկրում անցում կատարել պետական բյուջեի դեֆիցիտի փուլային կրճատմանը: «Որն է ավելի կարևոր՝ տնտեսությո՞ւնը, թե՞ աճը: Հենց այդ հարցն էլ այս պահին մի շարք բանավեճերի տեղիք է տալիս: Ես հակված եմ այն բանին, որ չի կարելի ձգտել միայն մեկ բանի: Այնպես որ, մենք կարող ենք մշակել այնպիսի ռազմավարություն, որը օգտակար կլինի և՛ այսօր, և՛ վաղը»,- ասել է նա:
Միաժամանակ նա ակնարկել է, որ ֆիսկալ կրճատումներն անհրաժեշտ է համարում տարածաշրջանի համար: ԱՄՀ ղեկավարի կարծիքով՝ ճգնաժամից դուրս գալու և բյուջետային դեֆիցիտն ամենամոտ ժամկետում կրճատելու փոխարեն, անհրաժեշտ է միանալ միջինժամկետային տնտեսության ծրագրին: «Մենք բոլորս հիանալի հասկանում ենք, որ ֆիսկալ կարգուկանոնը բացասաբար է անդրադառնում տնտեսական աճի վրա»,- ասել է նա: Նման ձևով Լագարդն առաջարկում է հավասարակշռել տնտեսությունը և աճը:
Հիշեցնենք. ապրիլի վերջին ԱՄՀ-ն կոչ էր արել Եվրամիությանը առավել ակտիվ պայքարել պարտքային ճգնաժամի դեմ: ԱՄՀ փորձագետները նշել էին, որ եվրոգոտու երկրները պետք է լուծեն իրենց պարտքային խնդիրները, անհրաժեշտ միջոցներ ձեռնարկեն բանկային համակարգի կայունացման համար և անցկացնեն ծայրահեղ կառուցվածքային բարեփոխումներ:
