Armenia.im բլոգերը այսօր գրում է.
Ինչ ասեմ, հալալա Հանրապետականներին: Իրանք ապացուցեցին, որ առանց լցոնում ու առանց վախեցնելու ու ճնշումների էլ կարող են հաղթել ընտրությունները. մենակ փողով, չոր փող: Նրանք ապացուցեցին, որ մեր ազգը փողի համար ամեն ինչ կանի: Ամեն ինչ: Ես սա հայերեն եմ գրում, որովհետև ամաչում եմ, որ այլ ազգի մարդիկ կարդան:
Մեր ազգը ամեն ինչ կանի փողի համար: Երբ ես ասում եմ «մեր ազգը» ես նաև նկատի ունեմ բոլոր այն կուսակցությունները և դաշինքները, որ մասնակցում էին ընտրություններին: Ես զարմացած չեմ, թե ինչու ՀԱԿ-ը հավաքեց 7%: Նրանց սակավաթիվ և աննպատակ հանրահավաքներից պարզ էր, որ ավել չեն հավաքելու: Ես չեմ զարմանում նաև, որ Հանրապետականները նկարեցին այդ տոկոսը, որ ՀԱԿ-ը անցնի՝ մեկա վտանգ չկա:
Այնպես անցկացնել ընտրությունները, որ դիտորդներից բռնած մինչև անգամ Ազգային Ժողով չանցած կուսակցություններ գոհ լինեն՝ այ սա վարպետություն է: Հենց սրա համար էլ ոչ մի կուսակցություն խելքին մոտ ծրագիր չէր գրել ու ներկայացրել: Մեկա ամեն ինչ պարզ էր:
Այնպես վերահսկել լրատվամիջոցները, որ անգամ ընդդիմադիր ԶԼՄ-ները ձենները կտրած նստեն ու բան չասեն, բացի «կասկածելի մերսեդես ավտոմեքենա է անցնում ընտրատարածքի կողքով»: Կամ իրանց ամենակարդացվող նյութը այսօր լինի «Ճոպանուղու տոմսերը թանկացել են» հոդվածը: Ու ֆսյո:
Այնպես կազմակերպել ամեն ինչ, որ անգամ մեկ հատ տեսանյութ չլինի ապացուցով. հալալա: Այս անգամ չկան ոչ մի ճնշումներ, ոչ մի լցոնում, մարդկանց լռեցնելու կամ վախեցնելու ոչ մի փորձ: Ինչ՞ի վախեցնեն կամ լցոնեն: Կամ ինչ՞ի հետո թվեր նկարեն: 21-րդ դարն է վերջիվերջո:
Հալալա Հանրապետականներին: Ինչ ասեմ: Այսպիսի ճիշտ քաղաքական խաղ ոչ ոք դեռ չէր խաղացել:
Բայց, մի բայց կա: 53 000-ից ավել ընտրող անվավեր է դարձրել քվեաթերթիկները: Իմ նման: Այ սրա համար եմ ես ուրախ: Սա այն մարդիկ են, թեկուզ սակավաթիվ, ովքեր չեն հավատում և ոչ մի դիմադիր կամ ընդիմադիր կուսակցությանը: Նրանք սպասում և հավատում են ծրագրերին: Նրանց համար Սերժ, Լևոն, Րաֆֆի, Գագիկ կամ Ռոբերտ միևնույն է:
Իսկ մնացած հարցերում հալալա Հանրապետականներին, նրանք հասկացան և առաջարկեցին մեր հայրենակիցներին այն, ինչ նրանք ուզում էին ամենից շատ՝ փող:
Այս պարագայում նաև հալալ է Հանրապետականներին, որովհետև իրանք սա շուտ հասկացան և ճիշտ կողմնորոշվեցին: Ուրիշ ոչ մի կուսակցություն կամ դաշինք չէր կարող տալ մարդկանց այն, ինչ նրանք ուզում էին ամենից շատ:
Ինչքան ուզում էս հրավիրի ընդդիմադիրին հեռուստաեթեր, բաց թող քաղբանտարկյալին թող վայնասունը գցի երկրով մեկ, մեկ է նա բան չունի ասելու և մեկ է մարդիկ դա չեն ուզում: Մարդիկ փող են ուզում: Փող տաս Էրդողանին էլ կընտրեն:
Եթե մարդիկ իրանց կամքով գնում են ու գաղտնի, կրկնում եմ փակ, քվեարկում են Հանրապետականի կողմ, ուրեմն հալալա Հանրապետականներին: Չէ իրոք հալալա:
Ես ասեմ ավելին:
Հիմա մեզ շատ շուտ է դեմոկրատիա: Որովհետև դեմոկրատիայի դեպքում մեծամասնությունն է ընտրում կառավարություն: Իսկ մեր մեծամասնությունը ինքներս հասկացանք թե ինչ է:
