Քաղաքագետների միության նախագահ Հմայակ Հովհաննիսյանը հրաժարվում է պատասխանել Ընտրությունների վերահսկման միասնական շտաբի հետագա գործողություններին վերաբերող ցանկացած հարցի, քանի դեռ կառույցի անդամ քաղաքական ուժերը քննարկումների մեջ են: Այս մասին նա ասաց «Առաջին լրատվական»-ի հետ զրույցում:
«Քանի դեռ կուսակցությունենրը չեն ամփոփել իրենց եզրահանգումները և գնահատականներ չեն տվել, մենք կսպասենք: Եվ միայն այն բանից հետո, երբ քաղաքական ուժերը կամփոփեն առկա արդյունքերը, ի մի կբերեն ձեռքի տակ եղած տվյալներն ու կգան միասնական շտաբ, այն ժամանակ էլ հնարավորություն կունենանք ասելու՝ ինչ ընդհանրական պատկեր է ստեղծվում»,- ասաց Հ. Հովհաննիսյանը:
Հարցին՝ հնարավո՞ր է, որ միասնական շտաբն ապագայում ՀՀԿ-ի հետ կոալիցիա կազմի, քաղաքագետների միության նախագահը պատասխանեց. «Միասնական շտաբը ձևավորվել է որոշակի նպատակի շուրջ, նպատակային համագործակցություն է: Այն կոալիցիա չէ, այլ ընտրությունների ընթացքը վերահսկող մարմին: Նման անհիմն մեկնաբանություններ անում էր «Ժառանգություն»-ը»,- հիշեց Հմայակ Հովհաննիսյանը: