Ամերիկյան անօդաչու սարքերի կողմից հասցված հարվածի արդյունքում այսօր սպանվել է եմենյան «Ալ-Քաիդա»-ի առաջնորդներից Ֆահդ Ալ-Քուսան:
Ինչպես հաղորդում է BBC-ն, օդային հարվածի հետևանքով զոհվել է ևս մեկ մարդ, նրանց մահվան փաստն արդեն հաստատվել է ամերիկյան դեսպանաատն և «Ալ-Քաիդա»-ի կողմից:
Ավելի վաղ Քուսայի մասին տեղեկատվություն հաղորդելու համար ԱՄՆ իշխանությունները սահմանել էին 5 մլն դոլար պարգև: Կստանա՞ արդյոք ինչ-որ մեկը այդ գումաը՝ չի հաղորդվում:
Ամերիկյան հետախուզական ծառայությունների տվյալներով՝ Ֆահդ Ալ-Քուսան անմիջական կապ է ունեցել 2000 թ. հոկտեմբերին Եմենի Ադեն նավահանգստում «Քոուլ» էսկադրոնային ականակրի պայթյունի կազմակերպմանը: Այդ ահաբեկչության հետևանքով զոհվել էր 17, վիրավորվել 40 ամերիկացի:
ԱՄՆ իշխանությունները միայն վերջերս են խոստովանել, որ անօդաչու սարքեր են օգտագործում Եմենում՝ հայտարարելով, որ դրա իրավունքն ունեն, քանի որ պատերազմի մեջ են գտնվում «Ալ-Քաիդա»-ի հետ: Ըստ BBC-ի՝ այս օդային հարվածը ընթացիկ տարում արդեն 9-րդն է:
