Երեկ՝ մայիսի 6-ին կայացած ԱԺ ընտրություններին արտասահմանյան դիտորդական առաքելություն իրականացրել են բացառապես անկախ դիտորդներ: Այսօր արտասահմանցի դիտորդների հրավիրած մամուլի ասուլիսի ժամանակ այս մասին ասաց Ընտրական համակարգերի միջազգային փորձագիտական կենտրոնի Իսրայելի ներկայացուցիչ Բարուխ բեն Ներիան:
Նրա խոսքերով՝ արտասահմանյան դիտորդական առաքելությունը եղել է Երևանում, Գյումրիում, Վանաձորում, Աբովյանում, Էջմիածնում և Արտաշատում:
ԱՄՆ ներկայացուցիչ Լիդիա Լաուսոնն իր հերթին նկատեց, որ ԱԺ ընտրություները տեղի են ունեցել առանց խախտումների՝ միջազգային չափորոշիչներին համապատասխան: < «Դիտորդները եղել են վեց մարզերի ավելի քան հարյուր տեղամասերում: Ընտրատեղամասերի ընդհանուր աշխատանքներն ընթացել են առանց խախտումների: Մի քանի տեղամասերում ընտրական գործընթացը առավելագույնս լավ է կազմակերպված եղել: Բայց նաև եղել են դեպքեր, երբ դիտորդները միջնորդել են ընտրական գործընթացներին, որոշ հանձնաժողովներ իրենց աշխատանքները լավ չեն կազմակերպել, խնդիրներ են եղել կնիքների հետ: Դրանք անձնագրերի միջից անհետացել են ընդամենը երկու ժամից: Այնուամենայնիվ, վիճակը շտկվել է»,- ասաց նա: Չեխիայի ներկայացուցիչ Աննա Չուրդովան էլ նշեց, որ արդեն երրորդ անգամ է դիտորդական առաքելություն իրականացնում Հայաստանում: «Այս անգամ ԱԺ ընտրությունները, նախորդների հետ համեմատած, անցան բավական լավ մթնոլորտում: Մեր դիտորդական առաքելությունն աշխատանքի ընթացքում նկատեց, որ ընտրատեղամասերում բավական խաղաղ մթնոլորտ է: Իհարկե, փոքր թերություններ կային, սակայն ուզում եմ շնորհակալություն հայտնել երեկվա ընրությունները կազմակերպած ու ձայները հաշվարկած մարդկանց: Դուք կարող եք հպարտանալ, որովհետև այս տարիների ընթացքում մեծ առաջընթաց եք ապրել և տարածաշրջանում ներկայանում եք իբրև ժողովրդավար երկիր»,- ասաց նա: Ասուլիսի մյուս բանախոս, Ավստրիայի ներկայացուցիչ Յոհան Ստադրելն իր հերթին հավելեց, որ ԱԺ ընտրություններին աննախադեպ թվով արտասահմանցի դիտորդներ են հետևել, և դա շատ գնահատելի է: Լեհական դիտորդական առաքելության ներկայացուցիչ Մաթեուշ Պիսկորսկին էլ, պատասխանելով լրագրողներից մեկի հարցին՝ «Ո՞ր երկրում են ավելի ժողովրդավար ընտրություններ անցկացվում՝ Հայաստանո՞ւմ, թե՞ Ադրբեջանում», ասաց, որ ինքը երբեք մեր հարևան երկրում ընտրությունների ընթացքին չի հետևել և չի կարող համեմատականներ անցկացնել: Լուսանկարը՝ PanArmenian.net-ի
