Սյունիքի մարզում ուրանի հանքերի շահագործման դեմ հավաքված 13,850 ստրագրությունները դեռևս անցած տարի դեկտեմբերին նախաձեռնողները ուղարկել էին ՀՀ կառավարություն։ Նախաձեռնողները՝ «Ազատամարտ» կոմիտեի ու «Կապանի տարածաշրջանի զարգացման» հիմնադրամի ներկայացուցիչները, ստացել են ՀՀ էներգետիկայի և բնական պաշարների նախարարության պաշտոնական գրությունը։ Ըստ այդմ, «Հայ-ռուսական լեռնհանքային կազմակերպություն» ՓԲԸ-ի կողմից իրականացվող երկրաբանահետախուզական աշխատանքները կատարվել են օրենսդրությամբ սահմանված կարգով։ Ավելին` հետազոտությունները իրականացվում են ժամանակակից սարքավորումներով ու մեթոդներով, որոնք կիրառվում են նաև Ռուսաստանում, ԱՄՆ-ում, Կանադայում, Ավստրալիայում և այլ զարգացած երկրներում։ Հիշեցնենք, որ մարզի Լեռնաձորի գյուղական համայնքում ուրանի հետախուզա-որոնողկան աշխատանքներ իրականացնող «Աբվան» ընկերությունը անցած տարվա դեկտեմբերի վերջին հորատող տեխնիկան հանել էր տարածքից ու տեղափոխել Երևան։ Ընկերության տնօրեն Յուրա Գևորգյանը այդ ժամանակ ասել էր, որ 2010թ. պայմանագրով նախատեսված որոնողական աշխատանքները ավարտվել են։ Նախարարության կողմից ուղարկված պաշտոնական գրության մեջ ասված է, որ Լեռնաձորում ուսումնասիրման աշխատանքները ավարտվել են։ «Ըստ կատարված երկրաբանական և լաբորատոր աշխատանքների տվյալների՝ նշված տարածքում ուրանի հանքավայրի առկայությունը չի հավաստվել։ 2011թ. ընթացքում երկրաբանական որոնողահետախուզական աշխատանքները նախատեսվում է իրականացնել այլ անոմալիաների և ուրանի երևակումների շրջակայքում, որոնք գտնվում են մարզի բնակավայրերից անվտանգ հեռավորությունների վրա»,-ասված է գրության մեջ։ Միաժամանակ էներգետիկայի և բնական պաշարների նախարարությունը հիշեցնում է, որ հաշվի առնելով մեր երկրի աշխարհաքաղաքական դիրքը, ազգային անվտանգության ապահովման հիմնախնդիրները՝ գերադասելի է ՀՀ տարածքում հայտնաբերել ուրանի հանքավայրեր և հաստատել դրանց պաշարները՝ որպես ռազմավարական նշանակության հումք։ Նախարության աշխատակազմի ղեկավարը նաև նշել է, որ «քանի դեռ երկրաբանական ուսումնասիրության աշխատանքների արդյունքում չի հավաստվել օգտակար հանածոյի առկայությունը և չեն հաստատվել վերջինիս պաշարները, ապա «հանքավայր» որպես այդպիսին գոյություն չունի, հետևաբար չի կարող լինել նաև հանքավայրի շահագործման ծրագիր»։