Երեկ երեկոյան Երևանի Հանրապետության հրապարակում տեղի ունեցած պայթյունի հետևանքով շուրջ 150 երիտասարդներ և համերգին ներկա անձինք ստացան այրվածքներ: Նրանցից ոմանք մինչ այժմ վերակենդանացման բաժանմունքում են, և բժիշկները չեն բացառում, որ նրանցից ոմանց անհրաժեշտ լինի դեմքի պլաստիկ վիրահատություն:
Հիշեցնենք, որ երեկ ՀՀ նախագահ Սերժ Սարգսյանը նշել էր, որ բոլորը կստանան համապատասխան բուժօգնություն և անհրաժեշտության դեպքում մասնագետներ կհրավիրվեն արտերկրից: Թեև բուժօգնությունը կիրականացվի պետպատվերի շրջանակում, փորձեցինք պարզել, թե Հայաստանում ի՞նչ արժե մաշկի փոխպատվաստումը:
Մայրաքաղաքի պլաստիկ վիրաբույժներից մեկը պարզաբանեց, որ Հայաստանում կիրառվում է երկու մեթոդ` մաշկի փոխպատվաստում և re sell, վերջինս Հայաստանում իրականացնում է միայն մեկ պլաստիկ վիրաբույժ: Ըստ վիրաբույժի` նվազագույն հաշվարկով փոխպատվաստումն արժե 80 հազար դրամից մինչև 1500 ԱՄՆ դոլար, իսկ re sell-ը` 1200 դոլար:
«Պլաստիկ վիրահատության գինը կախված է հիվանդի վերքի տեսակից, թե ինչ բարդության վիճակ է իր մոտ: Պատահում է, որ վիրահատությունը կատարում ենք պետպատվերի շրջանակում»,- «Առաջին լրատվական»-ի հետ զրույցում տեղեկացրեց մեկ այլ պլաստիկ վիրաբույժ Գոռ Ամիրբեկյանը:
Տեղեկացնենք, որ Ճառագայթային բժշկության և այրվածքների գիտական կենտրոնից տեղեկացնում են, որ դեռ պարզ չէ հիվանդները կունենա՞ն պլաստիկ վիրահատության կարիք, թե՞ ոչ:
