Առաջին մասնավոր Dragon տիեզերանավը կփորձեն Միջազգային տիեզերակայան ուղարկել մայիսի 19-ին: Տիեզերանավի արձակման նոր ժամկետը հաղորդում է Agence France-Presse-ը` վկայակոչելով SpaceX ընկերության ներկայացուցիչների հայտարարությունը: Տիեզերական ապարատը պատկանում է SpaceX–ին: Տիեզերանավի վերադարձը Երկիր նախատեսված է մայիսի 22-ին:
Dragon-ի արձակումն արդեն մի քանի անգամ տարբեր պատճառներով հետաձգվել է: Առաջին անգամ այն պետք է Միջազգային տիեզերակայան գործուղվեր 2011-ի նոյեմբերին, սակայն Ռոսկոսմոսը անվստահություն հայտնեց առ այն, որ տիեզերանավը չի համապատասխանում տիեզերական թռիչքների անվտանգության նորմերին:
Այնուհետև թռիչքի արձակման համար հայտարարվել էր 2012-ի փետրվարը: Այդ անգամ հետաձգման պատճառները տեխնիկական էին: Հաջորդը նշվեց ապրիլի 30-ը, որը ևս հետաձգվեց սարքավորումների հավելյալ ստուգում իրականացնելու անհրաժաշտության պատճառով:
Dragon–ն ունիվերսալ տիեզերանավ է, որը կարող է ծառայել որպես բեռնատար և մարդատար ապարատ: Այն կարող է Միջազգային տիեզերակայան փոխադրել մոտ 4 տոննա բեռ և տեղափոխել 7 մարդու: Dragon–ին ուղեծիր դուրս կբերի Falcon 9 հրթիռակիրը:
