Հռոմի Պապ Բենեդիկտոս 16-րդը և Ալբանիայի նախագահ Բամիր Թոփին այսօր տեղի ունեցած հանդիպման ժամանակ քննարկել են համաշխարհային ճգնաժամի, Ալբանիայի՝ ԵՄ-ին անդամակցելու և այլ հարցեր, ինչպես նաև եկեղեցու դերն ուսումնական և սոցիալական ոլորտներում:
Վատիկանի դիվանագիտությունը ողջունել է Ալբանիայի Եվրամիությանն անդամակցելու ձգտումը:
Բենեդիկտոս 16–րդի և Ալբանիայի նախագահի հանդիպումը տեղի է ունեցել Առաքելական պալատի գրադարանում, տևել է 20 րոպե: Նրանք զրուցել են իտալերենով:
Ալբանիայի նախագահը Պապին ներկայացրել է պատվիրակության անդամներին, կնոջը, որդուն: Ապա Թոփին հանդիպել է Վատիկանի պետական քարտուղար կարդինալ Տարչիզիո Բերտոնեի և Պապի դիվանագիտական գրասենյակի ղեկավար արքեպիսկոպոս Դոմինիկ Մամբերտի հետ: Հանդիպման ժամանակ քննարկվել են տարածաշրջանային բնույթի խնդիրներ:
2007 թ. դեկտեմբերին Ալբանիայի նախագահը կնոջ և երկու դուստրերի հետ այցելել էր Բենեդիկտոս 16-րդին:
Նախագահ Թոփին, ինչպես Ալբանիայի բնակչության 70 %-ը մուսուլման է: Ալբանիան միակ եվրոպական երկիրն է, որտեղ բնակչության մեծամասնությունը սունի մուսուլման է: Կաթոլիկները կազմում են Ալբանիայի բնակչության միայն 10 %-ը, իսկ հունական ուղղափառ եկեղեցուն հարում է ալբանացիների 20 %-ը: Ավելի քան կես դար տևած կոմունիստական վարչակարգի ժամանակ, Ալբանիան հայտարարվել էր «անկրոն պետություն», որտեղ ցանկացած կրոնական ծիսակատարություններին և ավանդույթներին հետևելն անօրինական էր համարվում:
