Երեկ Երևանի Հանրապետության հրապարակում գազով լցված փուչիկների պայթյունի հետ կապված արտակարգ միջադեպը հայտնվել է ռուսական մի շարք առաջատար ԶԼՄ-ների ուշադրության կենտրոնում:
Հիշեցնենք՝ երեկ Երևանի Հանրապետության հրապարակում Հանրապետական կուսակցության համերգ-քարոզարշավի ժամանակ փուչիկներից մեկի պայթյունի հետևանքով հրդեհ է բռնկվել, որի հետևանքով տարբեր աստիճանի վնասվածքներով հիվանդանոց է տեղափոխվել 154 մարդ:
Մասնավորապես, RIA Novosti-ն պայթյունի հետ կապված մեկնաբանություն է վերցրել «Գելիյմաշ» ոչ կառավարական կազմակերպության գլխավոր տնօրեն Վլադիմիր Ֆեդոտովից: Վերջինս հայտնել է, որ թեև Հայաստանի ԱԻՆ-ից տեղեկացրել են, որ փուչիկները լցված են եղել հելիումով, սակայն դա իներտ գազ է և չի այրվում:
«Ամենայն հավանականությամբ դա ջրածին է եղել: Հելիումը բացարձակ իներտ գազ է և ոչ մի քիմիական ռեակցիայի մեջ չի մտնում: Հելիումը քիմիական միացություններ կարող է կազմել միայն շատ հատուկ պայմաններում, և դրանք կայուն չեն»,- ասել է Ֆեդոտովը:
Պատասխանելով այն հարցին՝ արդյոք հնարավո՞ր չէր, որ փուչիկներում լիներ հելիումի և բնական գազի խառնուրդ, Ֆեդոտովն ասել է, որ դա բացառվում է: Նա նաև հավանական չի համարել, որ հատուկ փուչիկների համար հելիումից և այլ գազերից խառնուրդ պատրաստվեր, քանի որ դրա համար անհրաժեշտ են հատուկ սարքավորումներ:
«Ջրածնից բացի՝ միակ տարբերակը, որ կարելի է ենթադրել, դա եղել է մեթան, սակայն նրա օդ բարձրանալու ուժը մեծ չէ: Մեթանը կարող էր այրվել: Գազի սալիկների համար նախատեսված կենցաղային պրոպան-բութանը օդից ծանր է, այն ներքև է իջնում: Իսկ մեթանը՝ CH4, օդից թեթև Է: Տեսականորեն, փուչիկները կարող էին լցված լինել մեթանով»,- ասել է Ֆեդոտովը:
Rosbalt գործակալությունն իր հերթին, վկայակոչելով ռուսական IA REX գործակալությանը, գրում է, որ պայթյունը տեղի է ունեցել այն վայրում, որտեղ կանգնած են եղել ՀՀ նախագահ Սերժ Սարգսյանի թիկնապահները:
Հարկ է նշել, որ բոլոր ԶԼՄ-ներում շեշտված է, որ միջադեպից հետո համերգը շարունակվել է: Մասնավորապես «Կոմերսանտ» թերթը գրում է. «Պայթյունից մոտ 15 րոպե հետո համերգի հաղորդավարները հայտարարեցին, որ «արտասովոր ոչինչ տեղի չի ունեցել», որից հետո արտիստները շարունակեցին իրենց ելույթները»: «Բոցավառ համերգ» (Зажигательный концерт) վերտառությամբ հոդվածի վերջում թերթի լրագրողը հիշեցնում է, որ միջադեպը տեղի է ունեցել Հայաստանում խորհրդարանական ընտրություններից երկու օր առաջ, որի ընթացքում հիմնական պայքարը կընթանա իշխող կոալիցիայի երկու կուսակցությունների՝ Հանրապետականի և «Բարգավաճ Հայաստանի» միջև: