Անհրաժեշտ է շատ լավ մտածել մինչ Իրանի միջուկային օբյեկտներին հարվածելու որոշում կայացնելը: Կանադական Globe and Mail թերթում տպագրված հոդվածում նման համոզմունք է հայտնել Իսրայելի նախագահ Շիմոն Պերեսը: Երկուշաբթի պետք է սկսվի նրա պաշտոնական հնգօրյա այցը Կանադա, որի ժամանակ քննարկման կենտրոնական թեմաներից մեկը կլինի Իրանի միջուկային ծրագիրը:
Պերեսի խոսքերով՝ «Իրանի մոտ միջուկային զենք հայտնվելու տեղեկությունը հաստատելու համար անհրաժեշտ է վնասել նրա ստուգիչ և հսկողության համակարգերը»: Նախազգուշական հարվածը սպառնալիքի տակ կդնի նման համակարգ ստեղծելու հնարավորությունը, կարծում է նա:
«Ենթադրենք, թե ինչ-որ մեկը ցանկանում է հարվածել Իրանին,- գրում է նախագահը,- դե, ինչ, լավ է հնչում: Բայց ի՞նչ տեղի կունենա հարվածից հետո: Ոմանք ասում են, որ դա կթուլացնի Իրանը երկու կամ երեք տարի ժամկետով: Սակայն դա բավարար չէ»:
Պերեսը նշում է, որ Թեհրանի միջուկային սպառնալիքը «իրական խնդիր է ոչ միայն Իսրայելի, այլև ամբողջ աշխարհի համար»: «Այդ թվում և՝ ԱՄՆ-ի, որը նույնպես չի կարող իրեն թույլ տալ իրավիճակի այնպիսի զարգացում, որի դեպքում Իրանը կդառնա ամբողջ Մերձավոր Արևելքի կառավարիչ»,- ավելացնում է նա:
Իրանի միջուկային սպառնալիքը վերացնելու համար «անհրաժեշտ է ձևավորել երկրների կոալիցիա, և այդ հարցում, ես կարծում եմ, Օբաման ուշացել է»,- ասում է Պերեսը:
«Անհրաժեշտ է սկսել ոչ ռազմական գործողություններից և տնտեսական ու քաղաքական ճնշում գործադրել Թեհրանի վրա»,- գրում է Իսրայելի նախագահը: Սակայն, ըստ նրա, «տրամաբանական է ենթադրել»՝ եթե ոչ ռազմական միջոցառումները անհրաժեշտ արդյունքի չհանգեցնեն, պետք է դրան հետևեն «այլ տարբերակներ»:
Պերեսն Իսրայելի նախագահ է ընտրվել 2007թ., իսկ մինչ այդ երկար տարիներ գլխավորել է կառավարությունը և տարբեր նախարարություններ, այդ թվում՝ արտաքին գործերի և պաշտպանության նախարարությունները:
