Համաձայն «Արմենիա» հեռուստաընկերության և Gallup International Association ընկերության միջև կնքած համաձայնագրի` Հայաստանի պատմության մեջ առաջին անգամ ընտրությունների օրը կանցկացվի exit Poll: Այս հարցման առաջին արդյունքները կհրապարակվեն նույն օրը` ժամը 20.30-ի սահմաններում: Այս մասին «Առաջին լրատվական»-ին տեղեկացրեց սոցիոլոգ Արամ Նավասարդյանը` տեղեկացնելով exit poll-ի անցկացման տեխնոլոգիաները:
Արամ Նավասարդյանը նշեց, որ այն սկսվելու և ավարտվելու է ընտրություններին զուգահեռ: Ըստ նրա` հարցումներն անցկացվելու են 131 ընտրատեղամասերում: «Ամեն կետում երեք մարդ է աշխատելու, քվեարկությունից դուրս եկող քաղաքացիներին հարցնելու են, թե ում օգտին են քվեարկել: Մենք ընտրական գործընթացին չենք խանգարելու, իսկ առաջին տվյալները հրապարակվելու են 20.30-ին»,- նշեց սոցիոլոգը` հավելելով, որ 20.30-ին կհրապարակվեն մինչ 17.00–ը, 18.00-ն իրականացված հարցումների արդյունքները, այսինքն` տվյալները կմշակվեն և կներկայացվեն 20.30-ի սահմաններում:
Հարցին, թե վերջնական տվյալները երբ կհրապարակվեն, նա պատասխանեց, որ մինչև 12.00-ը կկարողանան մշակել բոլոր տվյալները և ներկայացնել ամբողջական պատկերը:
Արամ Նավասարդյանի հավաստիացմամբ` նման հարցումների սխալի հավանականությունը շատ քիչ է, որովհետև այն անցկացվում է մեծ թվով մարդկանց շրջանում: «Սխալի կոնկրետ տոկոսը չեմ կարող այս պահին ասել, քանի որ դա պայմանավորված է նաև մերժումների քանակից, բայց վստահելիությունն ավելի բարձր է, քան պարզապես սոցիոլոգիական հարցումներինը»,- մեկնաբանեց սոցիոլոգը:
Հիշեցնենք, որ, ըստ «Արմենիա» հեռուստաընկերության և Gallup International Association ընկերության միջև կնքած համաձայնագրի, վերջինս ապրիլի 19-23-ն ընկած ժամանակահատվածում իրականացրել էր սոցիոլոգիական հարցում, որի նպատակն էր պարզել գալիք ընտրությունների վերաբերյալ հասարակության տրամադրությունները։ Այդ հարցումների արդյունքներն արդեն հրապարկվել են:
