ԱՄՆ-ում հանրապետական-ընտրողները կցանկանային, որպեսզի փոխնախագահի պաշտոնի համար Մասաչուսեթսի նախկին նահանգապետ Միթ Ռոմնիի հետ առաջադրվի նախկին սենատոր Ռիք Սանտորումը կամ ներկայում Սենատի անդամ Մարկո Ռուբիոն: Այսպիսի եզրակացություն է արվել Reuters-ի անցկացրած հարցման արդյունքում:
Փոխնախագահի թեկնածուի պաշտոնում Սանտորումին ցանկացել է տեսնել հացման մասնակիցների 18, իսկ Ռուբիոյին՝ 17 տոկոսը: Ընդ որում՝ Ռուբիոյի օգտին են արտահայտվել պահպանողկանա «Թեյախմություն» շարժման անդամների մեկ քառորդը: Սանտորումին փոխնախագահի պաշտոնում ցանկացել է տեսնել այդ շարժման ընդամենը 16 տոկոսը:
Հանրապետականների ձայների 13-ական տոկոս հավաքել են Նյու Ջերսիի նահանգապետ Քրիս Քրիստին և Ֆլորիդայի նախկին նահանգապետ Ջեբ Բուշը՝ ԱՄՆ նախկին նախագահ Ջորջ Բուշ Կրտսերի եղբայրը: Արկանզասի նախկին նահանգապետ Մայք Հաքքաբիի թեկնածության օգտին է արտահայտվել հարցվածների 12 տոկոսը: Մյուս հնարավոր թեկնածուները հավաքել են 6 տոկոսից քիչ ձայներ:
Ռոմնին դեռ չի որոշել՝ ում առաջարկի առաջադրվել իր հետ: Ռուբիոն առաջարկել է Ռոմնիի առաջադրումը նախագահի պաշտոնում, սակայն հայտարարել է, որ չի պատրաստվում առաջադրվել փոխնախագահի պաշտոնում: Սանտորումը մինչ այժմ չի պաշտպանել Ռոմնիի թեկնածությունը:
Այս պահին հանրապետականներից նախագահական թեկնածուի համար պայքարը շարունակվում է Ռոմնիի և կոնգրեսական Ռոն Փոլի միջև, սակայն առավել հավանական է համարվում Ռոմնիի հաղթանակը:
ԱՄՆ նախագահական ընտրությունները տեղի կունենան 2012թ. նոյեմբերի 6-ին: