Չնայած այն հանգամանքին, որ Մասիսի ԲՀԿ-ական քաղաքապետը և ԲՀԿ-ական թեկնածու, թիվ 16-րդ ընտրատարածքում առաջադրված Տիգրան Ստեփանյանն այսօր «Առաջին լրատվական»-ի հետ զրույցում հերքեցին տեղեկատվությունը, թե երեկ երեկոյան Մասիսում տեղի ունեցած միջադեպը ՀՀԿ-ական և ԲՀԿ-ական թեկնածուների միջև է եղել, սակայն «Առաջին լրատվական»-ի տեղեկություններով, Մասիսի ԲՀԿ շտաբի դիմաց գտնվող սրճարանում տեղի ունեցած վիճաբանությունը թեժացել է այն ժամանակ, երբ նույն ընտրատարածքում առաջադրված ՀՀԿ թեկնածու Մուրադ Մուրադյանի կողմնակիցներից մեկը գարեջրի շշով հարվածել է սեղանի շուրջ նստածներից մեկի գլխին: Քաշքշուկը տեսնելով` ԲՀԿ-ականները հավաքվել են, ինչն էլ տեսնելով Մուրադ Մուրադյանի համակիրը սկսել է կրակել: Մեր աղբյուրների փոխանցմամբ՝ հիվանդանոց է տեղափոխվել Տիգրան Ստեփանյանի կողմնակիցներից մեկը:
Հիշեցնենք, որ այսօր «Առաջին լրատվական»-ի հետ զրույցում Տիգրան Ստեփանյանն ասել էր, թե միջադեպը քաղաքական բնույթ չունի, այլ քաղաքացիները իրար հետ նստել, գարեջուր են խմել ու վիճել: Մասիսի քաղաքապետ Դմիտրի Նազարյանն էլ միջադեպի հետևանքով հիվանդանոց տեղափոխված Կարեն Տ.-ի մասին հայտնել էր. «Ես էլ եմ լսել ձեզ նման, ազիզ ջան: Նույնիսկ էդ տղայի անունը որ տալիս են, մեր ավագանու անդամ է, շատ խելոք, խելացի, ընտրված ավագանու անդամ ա: Ես չգիտեմ` ոնց է եղել, կռվի մեջ է եղել, չի եղել, ես էլ ձեր նման լսել եմ, որ հիվանդանոցում պառկած ա: Ինչքան գիտեմ՝ կուսակցական պատկանելություն չունի: ԲՀԿ կուսակցությունից որ չի»:
«Առաջին լրատվական»-ը կրկին կապվեց Տիգրան Ստեփանյանի հետ` ճշտելու, թե արդյոք վիրավորվածը ԲՀԿ-ակա՞ն է: Վերջինս հերքեց տեղեկատվությունը. «Նման բան չկա: Նա ԲՀԿ անդամ չէ»:
