Այսօր Մաշտոցի պուրակում շուրջ 85 օր պուրակում տեղադրված կրպակների ապամոնտաժման համար պայքարող երիտասարդ ակտիվիստները նվեր կհանձնեն քաղաքապետին: Այս մասին «Առաջին լրատվական»-ին տեղեկացրեց բնապահպան ակտիվիստ Արփինե Գալֆայանը` մանրամասնելով այսօր տեղի ունենալիք ակցիայի նպատակը:
Նա տեղեկացրեց, որ ՀՀ Սահմանադրությունը հանձնելու են քաղաքապետին և տեղեկացնելու, թե որոնք են տեղական ինքնակառավարման մարմինների և դրանց ղեկավարի գործառույթները:
«Սահմանադրության գրքույկում հատկապես ընդգծել ենք այն հատվածները, որոնք պետք է ուշադրության արժանանան քաղաքապետի կողմից: Հուսով ենք` քաղաքապետը սա կընդունի»,- նկատեց Գալֆայանը` հավելելով, որ նման ակցիա անցկացնելու որոշումը կայացրել են մայիսի 1-ից հետո, երբ նախագահի հանձնարարականով Տարոն Մարգարյանը որոշեց պուրակում տեղադրված կրպակները ապամոնտաժել:
Նա նշեց, որ այսքանով «Մաշտոցի պուրակ» պայքարը չի ավարտվում, քանի որ իրենց ոչ օրինաչափ գործողությունների համար պետք է պատասխան տան այն բոլոր ոստիկանները, ովքեր ամբողջ պայքարի ընթացքում ուժ են կիրառել ակտիվիստների նկատմամբ:
Այս պահին մեկնարկել է երիտասարդ բնապահպանների և ակտիվիստների երթը դեպի քաղաքապետարան` սիմվոլիկ նվերը հանձնելու և ակցիա անցկացնելու նպատակով:
