Կանադան դադարեցնում է մեկ ցենտանոց մետաղադրամների հատումը, քանի որ դրա վրա չարդարացված կերպով մեծ գումար է ծախսվում: Ինչպես հաղորդում է CBC հեռուստալիքը, մեկցենտանոց վերջին դրամը կհատվի այսօր:
Այսօր Վինիպեգ քաղաքի դրամատանը տեղի կունենա հանդիսավոր արարողություն, որը կխորհրդանշի մետաղադրամի հատման ավարտը: Արարողությանը կմասնակցի Կանադայի ֆինանսների նախարար Ջիմ Ֆլաերտին:
Նշվում է, որ մետաղադրամը շրջանառությունից դուրս հանելու որոշումը կայացվել է այն բանից հետո, երբ երկրի իշխանությունները դրա հատումը խիստ ծախսատար են համարել, իսկ սպառողական ունակությունը՝ չափազան աննշան:
Արդեն աշնանը մետաղադրամները կդադարեն կիրառվել Կանադայի ֆինանսական հաստատություններում: Այնուամենայնիվ, դրանք կօգտագործվեն առձեռն հաշվարկներում այնքան ժամանակ, քանի դեռ կմնան բնակչության ձեռքում:
