«Human Rights Watch» կազմակերպությունն իր տարեկան զեկույցում քննադատել է Հայաստանի իշխանություններին` մարտիմեկյան դեպքերի առիթով պատշաճ հետաքննություն չանցկացնելու, ոստիկանությունում բռնարարքներ թույլ տալու, հավաքների ազատությանը խոչընդոտելու համար:
Զեկույցում անդրադարձ կա Չարենցավանի ոստիկանությունում ձերբակալված Վահան Խալաֆյանի մահվան հանգամանքներին, քաղբանտարկյալ, «Հայկական ժամանակ» օրաթերթի գլխավոր խմբագիր Նիկոլ Փաշինյանի նկատմամբ կատարված բռնություններին, «Ա1+» հեռուստաընկերության եթերազրկմանը և մարդու իրավունքների ոտնահարման այլ փաստերի: «Առաջին լրատվականը» քաղաքագետ Էդգար Վարդանյանից հետաքրքրվեց, թե ինչպես է գնահատում իրավապաշտպան կազմակերպության զեկույցը: «Տրված են բավականին օբյեկտիվ գնահատականներ: Կարող եմ գնահատել որպես կշռադատված օբյեկտիվ զեկույց: «Human Rights Watch»-ը, ի տարբերություն միջազգային այլ կառույցների, շատ ավելի օբյեկտիվ և շատ ավելի ազատ է իր գնահատականներում:
Եվ պատահական չէ, որ այդ կազմակերպության զեկույցները ամենախիստ գնահատականներն են պարունակում ընդհանրապես: Կարծում եմ, որ այդ զեկույցում տրված են այն գնահատականները, որոնք լիովին արտացոլում են մարդու իրավունքների հետ կապված վիճակը Հայաստանում»,- ասաց քաղաքագետը: «Առաջին լրատվականը» հետաքրքրվեց, թե այդ զեկույցը չի՞ լինի արդյոք Արևմուտքի ձեռքին ճնշման լծակ Հայաստանի նկատմամբ:
«Ճնշման լծակ լինում է այն դեպքում, երբ իշխանությունները հաշվի չեն նստում հասարակական տրամադրությունների հետ: Այդ իշխանությունները, բնականաբար, թույլ են և հնարավորություն են տալիս տարբեր տեսակի միջազգային կազմակերպություններին` իրենց վրա ճնշում գործադրել: Ճնշման լծակ տվել են հենց իշխանությունները և ոչ թե այս կամ այն կառույցի խիստ գնահատականները»,- ասաց մեր զրուցակիցը:
