Թուրքական Haber7 պորտալի խմբագրակազմը հրապարակել է «Մեծ խաղ» խորագրով հոդված, որում նշված է. «Թուրքիան տարածաշրջանում դիմակայում է իրանա-ռուսական դաշինքին, որը փորձում է Անկարային թույլ չտալ ակտիվ քաղաքականություն վարել Կովկասում և սահմանափակվել իր սահմաններով:
Դեռևս 20-րդ դարի սկզբին ռուս-իրանական դաշինքը Թուրքիան կտրեց թյուրքական աշխարհից՝ նրանց միջև կանգնեցնելով «հայկական պատ»: Եթե չլիներ այդ պատը, ապա Թուրքիան ավտոճանապարհով կկապնվեր Ադրբեջանի հետ, ապա Կասպիցի միջոցով՝ թյուրքական աշխարհի հետ: Սակայն ռուս-իրանական դաշինքը խափանեց այդ պլանները:
Ներկայումս Թուրքիան թյուրքական աշխարհի հետ կապող միակ օղակը Վրաստանն է, սակայն այդ ճանապարհը չի կարելի կայուն համարել ռուս-վրացական հակամարտության պատճառով: Ներկայումս ռուս-իրանական դաշինքը ձգտում է Թուրքիային շրջանցել նաև Մերձավոր Արևելքում, ցանկանում է նրան հակազդել Սիրիայում ու Իրաքում՝ աջակցելով այդ երկրների իշխող ռեժիմներին:
Եթե Թուրքիայի կառավարությունը մոտ ժամանակներս չակտիվացնի իր քաղաքականությունը և չկասեցնի ռուս-իրանական դաշինքի գործունեությունը, ապա նա կկորցնի իր նկատմամբ վստահությունը ոչ միայն Կովկասում ու Մերձավոր Արևելքում, այլև՝ ողջ իսլամական աշխարհում»:
