Ագրարագյուղացիական միության նախագահ Հրաչ Բերբերյանը կարծում է, որ քաղաքական ուժերը, բացի ծրագրերը ներկայացնելուց, պետք է նաև իրենց թիմը ներկայացնեն, որպեսզի գյուղացին էլ տեսնի, թե ով է լինելու ապագա գյուղատնտեսության նախարարը և ըստ այդմ՝ ընտրություն կատարի: Ինչպես այսօր լրագրողների հետ հանդիպմանը հայտարարեց Հ. Բերբերյանը, գյուղատնտեսության առումով առավել իրատեսական է ՀՀԿ ծրագիրը, սակայն ՕԵԿ-ին գյուղերում չեն ընտրի (խմբ. ներկայիս գյուղնախարար Սերգո Կարապետյանը ՕԵԿ անդամ է):
«Առաջին լրատվական»-ի հարցին՝ ինչպե՞ս եք վերաբերվում, որ հանրապետության խոշորագույն մթերող կազմակերպության ղեկավարը նաև գյուղատնտեսության նախարարությունն է ղեկավարում, Հ. Բերբերյանը պատասխանեց՝ Սերգո Կարապետյանը հայտարարել էր, թե հրաժարվել է կառավարել «Արտֆուդ»-ը, և այժմ երկրի ղեկավարությունը պետք է հստակեցնի իրավիճակը: Միաժամանակ նա քաղաքական ուժերին կոչ արեց ինքնամաքրվել՝ մի քանի կուսակցություններ «սողոսկած» անդամներից ազատվել:
Որքան էլ լրագրողները պնդեցին, Հ. Բերբերյանը այդպես էլ չկատարեց իր խոստումը՝ հրապարակել գյուղատնտեսությանն «արջի ծառայություն մատուցած» կուսակցության անունը: Նա միայն հույս հայտնեց, որ ապագայում գյուղնախարարությունում «Մումու»-ի «Գերասիմներ չեն լինի»:
