«Ազատություն» ռադիոկայանի փոխանցմամբ ԵԱՀԿ Ժողովրդավարական հաստատությունների և մարդու իրավունքների գրասենյակի դիտորդական առաքելությունը հրապարակել է իր երկրորդ միջանկյալ զեկույցը։
«Թեև ապրիլի 8-ին մեկնարկած և բուռն ընթացք ունեցող քարոզարշավի մասնակիցները հիմնականում ապահովված են քարոզչության, ինչպես նաև նախընտրական կարգախոսներ տեղակայելու համար համապատասխան տարածքների հնարավորություններով, այնուամենայնիվ եղել են քարոզչությանը խոչընդոտելու, այդ թվում` ծեծկռտուքի երկու դեպք Երևանում», – այս մասին իր երկրորդ միջանկյալ զեկույցում, որը հրապարակվել է այսօր, արձանագրում է ԵԱՀԿ/ԺՀՄԻԳ-ի դիտորդական առաքելությունը:
Զեկույցը, մասնավորապես, նշում է, որ արձանագրվել են ընտրական օրենսգրքի՝ քարոզչությունը կարգավորող դրույթների խախտումներ: Մասնավորապես, նկատի են առնվում այն դեպքերը, երբ դպրոցներում ուսուցիչներին և աշակերտներին առաջարկվել է մասնակցել Հանրապետական կուսակցության նախընտրական միջոցառումներին: Ընգծվում է նաև, որ որոշ կուսակցությունների քարոզչական նյութերը տեղադրվել են մունիցիպալ նշանակության շենքերի և ընտրական տեղամասերի վրա:
ԵԱՀԿ/ԺՀՄԻԳ-ի զեկույցը նաև արձանագրում է․ – «Գագիկ Ծառուկյանի սեփականությունը հանդիսացող բիզնեսի կողմից տարբեր շրջաններում տրակտորներ տրամադրելը դե ֆակտո կուսակցության քարոզարշավի բաղադրիչ է»։
Զեկույցը փաստում է, որ ապրիլի 17-ից սկսած ոստիկանությունը քննության է առել հնարավոր ընտրական իրավախախտումների 14 դեպք:
ԵԱՀԿ/ԺՀՄԻԳ-ի հրապարակած փաստաթուղթն անդրադառնում է նաև լրատվամիջոցների կողմից խորհրդարանական ընտրությունների քարոզարշավի լուսաբանմանը, արձանագրելով, որ մինչ քարոզարշավի պաշտոնական մեկնարկը մշտադիտարկման տակ գտնվող լրատվամիջոցները լայնորեն լուսաբանել են երկրի նախագահի ու վարչապետի գործունեությունը: Ապրլի 8-ից հետո, սակայն, ըստ զեկույցի, այդ միտումը էապես նվազել է, և ԶԼՄ-ների ուշադրության տակ են հայտնվել բոլոր հիմնական կուսակցություններն ու մեկ դաշինքը: Հանրային հեռուստաընկերությունը, ըստ ԵԱՀԿ/ԺՀՄԻԳ-ի, կատարել է բոլոր մասնակիցներին ազատ եթերաժամ տրամադրելու իր պարտավորությունը: