Ընտրողների ցուցակների 2 հզ., 3 հզ. կամ 4հզ. ճշգրումներն էական նշանակություն չունեն, առավել ևս, որ այդ ճշգրտումների որակը դժվար է ստուգել: Ինչպես «Առաջին լրատվական»-ի հետ զրույցում ասաց ժողովրդագիր, 1994-1998 թթ. ԿԲ նախագահ Բագրատ Ասատրյանը, խնդիրն ավելի բարդ է. Հայաստանը կոնկրետ միավոր է, բնակչության թվաքանակը՝ մոտ 3 մլն 250 հզ., վերջերս իրականացված մարդահամարի վերջնական արդյունքները դեռ չկան, բայց իրականում մոտ 500 հզ. փաստացի բացակայողներ կան երկրից, և առկա բնակչությունը շուրջ 2 մլն 700 հզ. է: Ընդ որում, ըստ Բ. Ասատրյանի, տարիքային առումով հիմնականում ակտիվ աշխատանքային տարիքի քաղաքացիներն են բացակայողները, այսինքն՝ առավելապես ընտրողները:
«Այդ 2-3 հզ-ն այս պարագայում ոչ մի եղանակ չեն ստեղծում, և մենք ունենք խնդիր, որ 400-500 հզ. ընտրող կա, որ փաստացի ՀՀ-ում չեն: Այդ հարցի պատասխանը ո՞վ կարող է տալ, չգիտեմ»,- ասաց Բ. Ասատրյանը՝ հավելելով, որ տեսականորեն դրսում գտնվող մեր քաղաքացիները կարող են վերադառնալ, և դրա դրսևորման «փայլուն» օրինակներ ունենք: Նա հիշեցրեց, որ նախորդ նախագահական ընտրությունների ժամանակ գյուղապետերից մեկն ասում էր, թե եկել ու քվեարկել են, բայց այդքանը չեն կարող միանգամից վերադառնալ, քանի որ չկա նաև համապատասխան տրանսպորտ:
«Դրա դեմն առնելու համար նախևառաջ վերահսկողություն է պետք, որ ընտրության մասնակցածների ցուցակները հրապարակվեն: Դա հիմնականն է, որ կքչացնի խախտումները: Երկրորդը ընթացիկ վերահսկողությունն է, որ կեղծիքներ թույլ չտան: Իսկ ամենակարևորն իշխանության կամքն է. եթե իշխանությունն ուզում է կեղծել, դրա դեմն առնել չի լինի»,- նշեց Բ. Ասատրյանը՝ հավելելով, որ հարկավոր է նաև հասարակական պահանջ:
Հիշեցնենք, որ ոստիկանությունն այսօր հրապարակել է ՀՀ ընտրողների ռեգիստրում ընդգրկված ընտրողների ընդհանուր թիվը՝ 2 մլն 482 հզ. 238: Շուրջ 1 ամիս առաջ ոստիկանությունը հրապարակել էր ընտրողների 2 մլն 485 հզ. 844 թիվ: Ճշգրտումը՝ 3606:
