Կապանի մշակույթի կենտրոնի կինոդահլիճում երեքշաբթի ասեղ գցելու տեղ չկար: Նույնիսկ կանգնած մարդիկ կային: 200 հոգանոց դահլիճում «Բարգավաճ Հայաստան» կուսակցության Կապանի տարածքային կոնֆերանսն էր, որին մասնակցեցին մոտ 250 պատվիրակ ու հյուրեր: Արտառոց ոչինչ թերևս չկար, եթե կուսակցության քաղխորհրդի անդամ Արմեն Ավագյանը չհայտարարեր, որ Սյունիքի մարզկենտրոնում կուսակցությունը իրականացրել է «Մաքրություն» ծրագիրը: «Հակառակ դեպքում, կուսակիցների թիվը ավելի շատ կլինեին, սակայն մնացել են նվիրյալները: Մենք կարողացանք ջոկել, թե ովքեր էին այլ նպատակներ հետապնդում»,-ասաց Ա. Ավագյանը: Իսկ տարածքային կազմակերպության նախագահ Կամո Աբրահամյանի հաշվետվության մեջ հիմնականում խոսվեց ֆինանսական ներդրումների մասին, թե կուսակցության և «Գագիկ Ծառուկյան» հիմնադրամի աջակցությամբ ինչ ծրագրեր են իրականացվել Կապանում:
Կատարված աշխատանքը գնահատվեց բավարար, ու պատվիրակները անցան խորհրդի անդամների ընտրությանը: Շատ հանգիստ, հերթով, բայց շատ արագ իրար հետևից կանգնում էին ձեռք բարձրացրած մարդիկ ու առաջարկում անուններ: Զարմանալի էր, որ կոնֆերանսի քարտուղարը հասցնում էր այդ արագությամբ գրանցել անունները: Սակայն «Առաջին լրատվականին» հաջողվեց լուսանկարել այն տետրը, որտեղ նախապես գրված էր, թե ով ում թեկնածությունը պիտի առաջադրեր: Ու հենց այդ տետրից էլ կոնֆերանսի նախագահողը կարդաց անունները: Միաձայն ընտրված խորհրդի անդամներն էլ ընտրեցին նախագահ: Այսինքն` Կամո Աբրահամյանը կշարունակի մնալ ԲՀԿ Կապանի ՏԿ նախագահ: Կոնֆերանսի սցենար-օրակարգը սպառվեց 50 րոպեում:
