Կոլումբիայում ԱՄՆ գաղտնի ծառայությունների աշխատակիցների մասնակցությամբ սեքս սկանդալը կարող է ավելի լուրջ հետևանքներ ունենալ: Ինչպես հաղորդում են ամերիկյան ԶԼՄ-ները, մարմնավաճառները, որոնց հետ զվարճացել են ԱՄՆ նախագահի թիկնապահները, հնարավոր է՝ լրտեսներ են եղել:
Հանրապետական սենատոր Չակ Գրեյսլին հայտարարել է, որ աղջիկները կարող էին լինել ռուսական հետախուզության գործակալներ: «Եթե ազգային անվտանգությունը չի կարող ապահովվել պատշաճ կերպով, դա արդեն կատակ չէ: Ով գիտե՝ ով կարող էր օգտագործել այդ մարմնավաճառներին: Ռուսները, ինչպես հայտնի է, մասնակիորեն օգտագործել են այդ մեթոդը մեզնից գաղտնի տեղեկություն ստանալու համար»,- հայտարարել է 79-ամյա սենատորը Radio Iowa-ին տված հարցազրույցում:
Ընդ որում, սենատորը թեմայի շուրջ չի ծավալվել և զերծ է մնացել կոնկրետ անուններ նշելուց:
Հիշեցնենք. ավելի վաղ ԶԼՄ-ներում լուրեր էին տարածվել, որ 2010 թ. ԱՄՆ-ում լրտեսության մեղադրանքով ձերբակալված ռուս Աննա Չափմանը փորձել է գայթակղել ԱՄՆ նախագահի վարչակազմի բարձրաստիճան պաշտոնյաներից մեկին:
Չակ Գրեյսլին մտնում է ԱՄՆ Սենատի իրավաբանական հանձնաժողովի կազմի մեջ, որն այս պահին սեփական նախաձեռնությամբ ստուգում է Կոլումբիայում տեղի ունեցած միջադեպը:
Կոլումբիացի մարմնավաճառների՝ լրտեսներ լինելու վարկածը պաշտպանել է նաև ԿՀՎ պաշտոնաթող սպա, գրող Ռոբերտ Բերը, որը նույնպես կոնկրետ մեղադրանքներ ներկայացնելուց զերծ է մնացել: