Մարզերում ընտրողների հետ հանդիպման շրջանակներում «Ժառանգության» ցուցակի ներկայացուցիչները` Րաֆֆի Հովհաննիսյանի գլխավորությամբ, այցելել են Գեղարքունիքի մարզ՝ Գավառ, Լիճք, Մարտունի, Վարդենիկ, Ծովինար, Վարդենիս և Սևան: Պատվիրակության կազմում էին նաև ՀՀ ԱԺ պատգամավոր Զարուհի Փոստանջյանը, ՀՀ ԱԳ նախկին նախարար, նախկին քաղբանտարկյալ Ալեքսանդր Արզումանյանը, «Ժառանգության» փոխնախագահ Ռուբեն Հակոբյանը, ՀՀ ԱԺ նախկին փոխխոսնակ, նախկին քաղբանտարկյալ Կարապետ Ռուբինյանը և ցուցակի այլ ներկայացուցիչներ:
«Ժառանգության» շտաբի լրատվական ծառայությունից «Առաջին լրատվական»-ին հայտնում են, որ ելույթ ունենալով Գավառ քաղաքում՝ Րաֆֆի Հովհաննիսյանը երկընտրանք է առաջադրել՝ շարունակել հինը, թե՞ ունենալ նորը՝ «Նոր Հայաստան, նոր Գավառ, նոր աշխատավարձ, նոր իրավունք, նոր արժանապատվություն»:
«Հնո՞ւմ պիտի մնանք, թե՞ միասին պիտի գանք»,- շեշտել է «Ժառանգության առաջնորդը: Նա նաև «Ժառանգության» միացյալ ցուցակի անունից հայտարարել է. «Մայիսի 6-ից, 7-ից հետո, մենք ձեր առջև հաշվետու ենք լինելու»:
Լիճքում Ալեքսանդր Արզումանյանը հայտարերել է, որ տեղեկություն է ստացել քարոզարշավը գյուղապետի կողմից խոչընդոտելու վերաբերյալ:
«Ինձ հենց նոր մի տեղեկություն հայտնեցին, որը շատ զայրացրեց: Ասում են, որ ավելի շատ մարդ էր հավաքված «Ժառանգության» հետ հանդիպման համար, բայց գյուղապետը վախեցրեց, և մարդկանց մի մասը գնացին իրենց տուն: Ես զարմանում եմ, գյուղապե՛տը պետք է վախենա ձեզանից, այլ ոչ թե դուք իրենից: Նա ձեր ծառան է, եթե լավ չծառայի, կարող եք այլևս նրան չընտրել: Ինչի՞ց եք վախենում, չեմ հասկանում: Ես նստել եմ 1988, 2007, 2008 թվականներին ու պետք լինի էլի կնստեմ, որ իմ երեխաները կարգին երկրում ապրեն», – ասել է Արզումանյանը:
Օգտվելով հնարավորությունից, «Ժառանգության» ներկայացուցիչները նաև հրավիրել են բոլորին ներկա գտնվել մայիսի 1-ին, ժ. 19:00-ին, Երևանի Ազատության հրապարակում կայանալիք համերգին, որին ելույթ կունենան սիրված երգիչ և երգահան Ռուբեն Հախվերդյանը և «Ժառանգությանը» սատարելու համար Հայաստան ժամանող հայտնի երգիչ Հարութ Փամբուկչյանը:
