Gallup International-ի և Հանրային կարծիքի ուսումնասիրության համառուսաստանյան կենտրոնի (ВЦИОМ) միջև զուգահեռներ անցկացնելիս սոցիոլոգ Գևորգ Պողոսյանն առավել արժանահավատ և քաղաքական շեշտադրումներից զերծ է համարում դրանցից առաջինի ներկայացրած սոցիոլոգիական հարցման տվյալները, քանի որ ինքն անձամբ է պատասխան տալիս կատարված աշխատանքների հավաստիության և վստահելիության համար: Այս մասին նա ասաց «Առաջին լրատվական»-ի հետ զրույցում:
«Միաժամանակ, հակված չեմ ինչ-որ մեկին ավելի շատ, մյուսին ավելի քիչ հավատալ: Իհարկե, Gallup International-ը համաշխարհային բրենդ է, իսկ Հանրային կարծիքի ուսումնասիրության համառուսաստանյան կենտրոնն աշխատում է առավելապես Ռուսաստանում ու ԱՊՀ երկրներում, բայց երկուսն էլ բարձր որակի կենտրոններ են: Այլ բան է, որ նրանց ներկայացրած տվյալների միջև բավականին մեծ տարբերություն կա: Հնարավոր է, որ ВЦИОМ-ն ավելի քաղաքականացված շեշտադրումներով տվյալներ ներկայացրեց: Եթե նայենք, մեր տվյալներով, օրինակ, ՀԱԿ-ն անցնում է 7 տոկոսանոց շեմը, իսկ իրենց տվյալներով՝ չի մոտենում»,- նշեց Գևորգ Պողոսյանը:
Սոցիոլոգը կարևորեց հատկապես այն հանգամանքը, որ եթե Gallup-ը միշտ նշում է իր տեղական գործընկերոջ անունը, ապա Հանրային կարծիքի ուսումնասիրության համառուսաստանյան կենտրոնը՝ ոչ: «ВЦИОМ-ի պարագայում միշտ խոսում է նրա տնօրենը, սակայն համոզված եմ, որ հայաստանյան հարցումները նա միայնակ չի անցկացրել, առավել ևս՝ ինքը չի անցկացրել»,- ասաց սոցիոլոգը:
Հիշեցնենք, որ Հանրային կարծիքի ուսումնասիրության համառուսաստանյան կենտրոնի (ВЦИОМ)՝ «Եթե ընտրությունները լինեին այս կիրակի, ո՞ր կուսակցությանը կընտրեիք» ավանդական հարցին հարցվածների 32%-ը պատասխանել է հօգուտ ՀՀԿ-ի, 27%-ը՝ ԲՀԿ-ի, 5%-ը՝ ՕԵԿ-ի, 4-ական տոկոսը՝ «Ժառանգության» և ՀՅԴ-ի, 3%-ը՝ Հայ ազգային կոնգրես ընդդիմադիր դաշինքի և 2%-ը՝ Հայաստանի կոմունիստական կուսակցության։
