Նախընտրական այս օրերին, երբ կուսակցությունները և համամասնական ցուցակով առաջադրված թեկնածուները ջանք ու եռանդ չեն խնայում շփվելու ընտրողների հետ, խոստումներ շռայլելու, երբ իշխանական կուսակցությունը լծված է քարոզարշավների ժամանակ հիմնարկ-ձեռնարկությունների, կրթօջախների աշխատակիցներին զոռով հանրահավաքի հրապարակ բերելուն, հոգևորական դասի ներկայացուցիչները հավաստիացնում են, որ այս կամ այն կուսակցությանը կամ թեկնածուին ձայն տալու հրահանգ դեռ չեն ստացել:
«Առաջին լրատվական»-ը խորհրդարանի առաջիկա ընտրությունների, քարոզարշավի ընթացքի, հասարակության մեջ նախընտրական լարվածության վերաբերյալ զրուցեց Հայ Առաքելական եկեղեցու հոգևոր սպասավորների հետ: Վերջիններս հիմնականում նշում էին, որ քաղաքականությունից հեռու մարդ են և խուսափում էին որպես հոգևորական կարծիք հայտնել:
«Այս ընտրությունների հետ կապված գնահատական տալ ինձ իրավունք չեմ վերապահում, որովհետև ինքս դրա մասնագետը չեմ, բայց որպես քաղաքացի ունեմ իմ դիրքորոշումը»,- ասաց Սուրբ Երրորդություն եկեղեցու հովիվ Տեր Եսայի քահանա Արթենյանը: Հարցին` ծանո՞թ է կուսակցությունների նախընտրական ծրագրերին և ո՞ր կուսակցության նախընտրական ծրագիրն է հավանել, Տեր Եսային ասաց` ծանոթ է այնքանով, ինչքանով հետևում է լրատվությանը. «Թույլ տվեք չասել, թե որ կուսակցությանն եմ համակրում, որովհետև դա նաև կհամարվի քարոզչություն»:
Տեր Եսայու ցանկությունը մեկն է` նախընտրական շրջանը լինի խաղաղ, առանց խժդժությունների, բռնությունների` թե՛ ‘ նախընտրական, թե՛ ‘ հետընտրական շրջանում. «Այս հարթության վրա տեղի ունեցող բռնությունները չեմ ուզենա, որ խորանան և արմատավորվեն մեր հասարակությունում»: Նա հավաստիացրեց, որ եկեղեցու վրա ճնշումներ չկան. «Ոչ միայն հոգևորականության, այլ եկեղեցիներում ընդհանրապես խուսափում ենք այդ թեմաների մասին խոսելուց, որովհետև դա կարող է ընկալվել որպես քարոզչություն, ցուցում, որ գնացեք այս կամ այն կուսակցությանը ընտրեք: Այսինքն` եկեղեցում ընդհանրապես ընտրությունների թեման չի շոշափվում: Առավել ևս չենք ասում, թե մենք ում կողմնակիցն ենք, և հնարավոր է որպես հոգևորական որևէ կուսակցությանը համակրես, բայց չենք բարձրաձայնում այդ մասին ժողովրդի շրջանում: Որովհետև նախ հոգևորականներս կուսքաղաքականությամբ զբաղվելու իրավունք չունենք, դա նաև կարող է մարդկանց ապակողմնորոշել և դիտվել ցուցում, որ գնացեք այս կամ այն քաղաքական ուժին ձայն տվեք»:
Սուրբ Հովհաննես Մկրտիչ եկեղեցու հոգևոր սպասավոր Տեր Շմավոն քահանա Ղևոնդյանն էլ ասաց, թե չի սիրում քաղաքականությամբ զբաղվել. «Որևիցե մեկի ծրագիրը չեմ ընդունում, չեմ էլ ծանոթացել և չեմ էլ ուզում ծանոթանալ, անհետաքրքիր է, որովհետև այդ ամեն ինչը խաղեր են` քաղաքական խաղեր են, ամեն մեկն ինչ-որ բանով փորձում է խաբել, յուրաքանչյուր տարի խոստումները չեն իրականանում, դրա համար ինձ հետաքրքիր չէ: Պարզապես ես ամեն տարի, որպես քաղաքացի, աշխատում եմ այնպես անել, որ օգուտ բերեմ իմ երկրին: Միայն այդքանը: Միշտ էլ գնում ենք ընտրությունների, քվեարկում, որպես քաղաքացի մեր պարտքը կատարում, թե ում կքվեարկենք, այդ օրը պարզ կդառնա, կտեսնենք: Կքվեարկեմ այն անձին, որին քիչ թե շատ ճանաչում եմ, որի նկատմամբ քիչ թե շատ համակրանք ունեմ զուտ որպես մարդ, որին կճանաչեմ, ոչ ավելին»:
Կաթողիկե Սուրբ Աստվածածին եկեղեցու հոգևոր հովիվ Ավետիս քահանա Դանիելյանն էլ ասաց. «Ոչ ոք չի ասում` սրան ձայն տանք, նրան ձայն տանք: Բայց քարոզարշավին, իհարկե, չենք մասնակցում, բոլորը մեր քաղաքացիներն են, մեր եկեղեցու զավակներն են, ինչ-որ կուսակցության կամ անհատի համար չենք քարոզում, մեր քաղաքացիական պարտքը կկատարենք որպես քաղաքացիներ և վերջ, ինչ-որ մասնավոր հանդիպումներ կամ շփումներ պատգամավորության թեկնածուների կամ կուսակցությունների հետ չունենք»: Քահանան ասաց, թե չի ուզենա, որ ժողովուրդն ընտրակաշառք վերցնի, գնա ընտրության. «Չէի ուզենա, բայց, ցավոք, կան այդ երևույթները: Խաբողը կխաբի, չխաբողը չի խաբի, լավ է, որ ժողովուրդն ինքն իմաստուն լինի, որ ինքը տարբերի` ում ընտրի, ում հետ կապի իր երեխաների, իր երկրի ապագան: Հուսահատությունը մեծ մեղք է մարդու համար, ճիշտ է մարդիկ հատկապես մարզերում դժվար են ապրում, բայց դեմ եմ, որ կաշառք վերցնեն: Ինձ թվում է` լավ է, որ մարդիկ երբեք չհուսալքվեն, այլ գնան իրենց խղճի մտոք ընտրեն: Նույն կրոնական վիճակն է` աղանդավորները գալիս են, ժողովրդին խաբում, մոլորեցնում են, այնպես էլ մարդիկ, անհատները, կուսակցությունները կարող են մոլորեցնեն, իրենք իրենց ապագան ընտրեն: Ցավում եմ, որ մոնոտոն մի ազգ ենք ու նույն լեզվով իրար ենք խաբում, հայը հայ մարդուն պետք չի, որ խաբի: Ես հավատավոր մարդ եմ, բոլորն էլ պիտի պատասխան տան Աստծո մոտ»:
Տեր Կյուրեղ քահանա Տալյանն էլ նշեց, որ գնալու է իր քաղաքացիական պարտքը կատարելու, սպասումներ ունի` ինչպես բոլորը: Քարոզարշավին չի հետևում, որովհետև ժամանակ չունի:
