Վերջին օրերի ընթացքում քաղաքական ուժերն ակտիվացան․ նախընտրական քարոզչության պասիվ տասնօրյակին հաջորդեցին կազուսները։ Գնահատելով գալիք խորհրդարանական ընտրություններին մասնակցող քաղաքական ուժերի նախընտրական քարոզչությունը՝ «Առաջին լրատվական»–ի հետ զրույցում նման տեսակետ հայտնեց քաղտեխնոլոգ Կարեն Քոչարյանը։
Ըստ նրա՝ ակտիվ շրջանի ընթացքում եղավ ԲՀԿ առանջնորդ Գագիկ Ծառուկյանի Vertu-ի պատմությունը, եղան մի քանի իրադարձություններ, որոնց մասին սկսեցին խոսել, եղավ չորս քաղաքական ուժերի միասնական շտաբի պատմությունը, բոլոր ուժերը սկսեցին իրար սևացնել։ Այն խոստումները, թե չեն սևացնելու, տևեցին շատ կարճ։
Քաղտեխնոլոգի կարծիքով՝ վերջին երկու օրը ցույց տվեց, որ նախընտրական քարոզչությունը գնալով կագրեսիվանա և կակտիվանա հիմնական խաղացողների շրջանում։ «Առաջին լրատվական»-ի դիտարկմանը, թե ինչով կարելի է բացատրել «Ժառանգություն» կուսակցության հասցեին հաճախակիացած քննադատությունները, Քոչարյանը պատասխանեց, որ իր կարծիքով՝ «Ժառանգությունն» այս պահին հավակնում է ընդդիմության լիդեր լինել, բնականաբար ՀԱԿ-ը և ՀՅԴ-ն պետք է քննադատեն նրան, որովհետև զգում են, որ իրենցից է ձայներ տանում:
Հարցին, թե ԲՀԿ առանջորդի՝ հանրային միջոցառման ժամանակ զենք կրելը կազդի՞ նրա վարկանիշի վրա, մեր զրուցակիցը պատասխանեց, որ դա ոչ միայն ինքն է ասում, բոլորն այդ կարծիքին են։ Կարեն Քոչարյանը հիշեցրեց, որ դրան արձագանքեց և՛ Ֆյոդորովը, և՛ Ռիչարդ Կիրակոսյանը: Նրա խոսքով՝ գրեթե ոչ մի ուժ չի նախատեսում ինչ-որ անսպասելի անակնկալ իրավիճակներ, որից կարող է հանել կրիզիս մենեջերը։ «Այդ պատճառով եղավ խառնաշփոթ, երբ մամուլի խոսնակը մեկ բան ասաց, նույնը կրկնեց Գագիկ Ծառուկյանը, իսկ Վարդան Օսկանյանը մեկ ուրիշ բան ասաց, որից հետո էլի Գագիկ Ծառուկյանն ասաց, որ դա իսկապես զենք է եղել։ Այսինքն՝ այս խճճելն ավելի վնաս բերեց իրենց, քան երբ ի սկզբանե ասեին, որ դա եղել է զենք»,- նկատեց Կ. Քոչարյանը։
Հիշեցնենք, որ ԲՀԿ առաջնորդ Գագիկ Ծառուկյանն Էջմիածնի ընտրողների հետ նախընտրական հանդիպմանը ներկայացել էր Vertu ապրանքանիշի զենքով: ԲՀԿ–ի մի շարք պնդումներից հետո, թե Ծառուկյանի մոտ եղել է նույն ապրանքանիշի հեռախոս, Բագրատաշեն գյուղում ընտրողների հետ հանդիպման ժամանակ Ծառուկյանը հաստատել էր, որ իր մոտ զենք է եղել:
