«Հրապարակ»-ը գրում է, որ նախընտրական քարոզարշավի այս օրերին կաթվածահար է եղել նաև թաղապետարանների աշխատանքը:
«Այստեղ փոքրից մեծ ակտիվորեն լծվել են նախընտրական աշխատանքներին: Թաղապետարաններում կան ՀՀԿ շտաբներ, ու աշխատակիցները հիմնականում ծանրաբեռնված են ոչ թե իրենց բուն գործով, այլ կուսակցության օգտին քվեներ ապահովելու համար լուծում տալով տարբեր հարցերին, որոնցով թաղապետարան են դիմում քաղաքացիները: Այս «հումանիստական» առաքելության պատճառով տուժում են այն քաղաքացիները, ովքեր թղթաբանության հետ կապված գործ են ունենում որևէ համայնքապետարանում:
«Նրանք ստիպված են ինչ-որ կնիքի կամ բաժնի պետի ստորագրության պատճառով ժամերով սպասել, քանի որ համայնքապետարանների վերնախավը զբաղված է նախընտրական շտաբների պահանջները կատարելով»:
Երեկ թերթի թղթակիցն ականատես է եղել, թե ինչպես մի քաղաքացի մտել Է Նոր Նորքի թաղապետարան ու փնտրել ՀՀԿ շտաբը՝ գումար ստանալու նպատակով:
«Ի դեպ, թաղապետարանների բոլոր աշխատասենյակները քարոզարշավի այս օրերին լեցուն են քաղաքացիներով: Համայնքների բնակիչները, շտապում են իրենց կենցաղային բոլոր հարցերին լուծում տալ մինչև ընտրությունը»:
