Եգիպտոսի մայրաքաղաքի Թահրիր հրապարակում ուրբաթ օրը տեղի ունեցած «Ճակատագրի ընտրություն» խորագրով զանգվածային ցույցը, որին պիտի մասնակցեին մինչև 90 կուսակցություններ, քաղաքական, հասարակական և երիտասարդական շարժումներ, վերածվել է եգիպտացի իսլամիստների քարոզարշավի։ Այս մասին, հաղորդում է РИА Новости-ն:
Վաղ առավոտից եգիպտական նահանգներից ավտոբուսներով հրապարակ են տեղափոխել «Մուսուլման եղբայրներ»–ի, «Նուռ» սալաֆիտյան կուսակցության և «Ալ-Գամաա Ալ-Իսլամիա» խմբավորման կողմնակիցներին: Չնայած ակցիայի կազմակերպիչների` ակցիան որևէ կուսակցական երանգից զերծ պահելու և «ժողովրդի միասնական ձայնով» հանդես գալու որոշմանը, իսլամիստները հրապարակում տեղադրել են մի քանի ամբիոն և սկսել են իրենց կուսակցական առաջնորդների քարոզարշավները:
Իսլամիստների կողմնակիցները ցուցարարների մեջ նախընտրական քարոզարշավից հեռացված նախագահի իսլամիստական թեկնածուների անունները վանկարկելով՝ կոչ են արել Եգիպտոսում ստեղծել իսլամական պետություն: «Արի, արի Իսլամ Խազեմի (սալաֆիտների թեկնածուն, ում ԿԸՀ–ն չի գրանցել որպես նախագահի թեկնածու) և Ղուրանի հետ»,-վանկարկել են ցուցարարները:
Մի շարք լիբերալ և երիտասարդական շարժումներ ստիպված են եղել լքել հրապարակը: Միակ միասնական պահանջը, որը հնչել է Թահրիրում քաղաքական ուժերի մեծ մասի կողմից, նախկին վարչակարգի ներկայացուցիչներին` նախկին վարչապետ Ահմեդ Շաֆիկին և ԱՊԼ նախկին գլխավոր քարտուղար Ամր Մուսային նախագահական ընտրությունների մրցավազքից հեռացնելն է։
